https://innews.az/uploads/news/2023-01/_innews_f118c297c50ca0999288e7349_o.jpg
Azərbaycanlı ifaçı, prezident təqaüdçüsü Emin Eminzadə İngiltərədə özünün “EMİNZADA” vokal studiyasını açıb və yeni albom buraxmağa hazırlaşır.
2020-ci ildə müğənni Londonun nüfuzlu universitetlərindən birinə - Britaniya və İrlandiya Müasir Musiqi İnstitutuna daxil olub və onu fərqlənmə diplomu ilə bitirib. Artıq iki ildir ki, musiqi karyerasını orada davam etdirir, mahnılar buraxır, layihələr üzərində işləyir və Azərbaycan musiqisini təbliğ edir.
Bu yaxınlarda Emin İngiltərədə “EMİNZADA” vokal studiyası açıb, burada oxuma və mahnı yazmaqdan dərs deyir. Burada o, tələbələrini əsasən Azərbaycan xalq, klassik və müasir musiqi ilə tanış edir.
“Bu ideya məndə çoxdan var idi, lakin iş və təhsilin sıx qrafiki səbəbindən həyata keçirməyə imkan yox idi. Mən çox istəyirəm ki, musiqimiz bütün dünyada tanınsın və ifa olunsun. Məndə oxumaq istəyənlər çoxdur. Təcrübəmi və məsləhətlərimi onlarla bölüşürəm. Mən onların nəticələrindən razıyam. Studiyada da konsertlər təşkil edirik. Gələcəkdə bu studiya ilə bağlı çoxlu planlarım var”, - deyə Eminzadə bildirib.
Hazırda sənətçi bu ilin fevralında çıxması planlaşdırılan yeni musiqi albomunun da yazılması üzərində işləyir.
Emin Eminzadə Qazaxıstanda keçirilən "Qızıl mikrofon" müsabiqəsinin qalibidir. İtaliyada keçirilən Elia Catalano və 2012-ci İspaniyada təşkil olunan Opus müsabiqələrində iştirak edib.
O, Bakıda məşhur İtaliya müğənnisi Robertino Loretti ilə eyni səhnəni bölüşərək onunla "Jamayka" və "O Sole Mio" kompozisiyasını duet oxuyub. Dünya şöhrətli ulduz bu ifadan sonra Eminzadəni "Azərbaycanın Robertinosu" adlandırıb.
O, hətta ABŞ-da tələbə mübadiləsi proqramı üzrə təhsil almaq üçün təqaüd qazanmağa müvəffəq olub və Texasda təhsil alıb. Emin Eminzadə daha sonra Amerika Musiqi və Dram Akademiyasına daxil olub və oranı bitirib. Hazırda gənc müğənni Azərbaycanda, Türkiyə və ABŞ-da karyerasını davam etdirir. Müğənninin adı "Azərbaycanın gənc ifaçılarının qızıl kitabı"na düşüb.
Ən son xəbərləri səhifəmizdən də izləyin
