https://innews.az/uploads/news/2023-02/_innews_5e02476ba891e16e07b2cf497_o.jpg
Milan Politexnik Universitetinin nümayəndə heyəti 25-28 yanvar tarixlərində ADA Universitetində olmuş və 2022-ci ilin may ayından etibarən aparılan ilkin araşdırmanın nəticələrini təqdim etmişdir. Araşdırmanın məqsədi ölkənin səciyyəvi xüsusiyyətlərini, potensialını, təhsil sistemini öyrənmək və Dizayn və Memarlıq fakültəsi üçün strateji baxışı hazırlamaq olmuşdur. Araşdırmaya həmçinin yüksək reytinqli beynəlxalq universitetlərin qabaqcıl təcrübəsinə əsaslanan tövsiyyələr də daxil edilmişdir.
Nümayəndə heyəti Rektor Hafiz Paşayevin rəhbərliyi ilə növbəti mərhələdə görüləcək işlər, o cümlədən, akademik proqramların hazırlanması, mərhələli şəkildə açılması, studia və laboratoriyaların dizaynı, akademik heyətin işə götürülməsi və təlimlənməsini müzakirə etmişdir. Yaranacaq Dizayn və Memarlıq fakültəsində həm bakalavr, həm də magistratura pilləsində Memarlıq, Şəhərsalma, Landşaft memarlığı, Məhsul (sənaye) dizaynı, İnteryer dizaynı və Kommunikasiya dizaynı ixtisasları tədris olunacaq.
İtaliya-Azərbaycan Universiteti üzrə İşçi Qrupunun rəhbəri Qalib Məmmədin sözlərinə görə bu əməkdaşlığın əsasını sözügedən ixtisaslar üzrə insan kapitalının, yüksək keyfiyyətli kadrların, dərin texniki biliyə malik peşəkarların yetişdirilməsi təşkil edir.
Milan Politexnik Universitetinin nümayəndə heyətinin rəhbəri Silviya Debora Ferraris bildirib ki, bu cür ətraflı araşdırma tərəfdaşlara ölkənin özünəməxsus mədəni kimliyinə və ənənələrinə əsaslanan, eyni zamanda yüksək keyfiyyətli və beynəlxalq standartlara cavab verən bakalavr və magistratura pillələri üzrə təhsil proqramları hazırlamağa imkan verir.
Habelə, İtaliyanın ölkəmizdəki səfiri Klaudio Taffuri nümayəndə heyəti ilə görüşərək işin gedişatını müzakirə edib.
Xatırladaq ki, Milan Politexnik Universitetinin ilkin araşdırma çərçivəsində ölkəmizə ilk səfəri 2022-ci ilin iyun ayında baş tutub. Səfər zamanı aidiyyəti dövlət qurumları ilə yüksək səviyyəli görüşlər keçirilib. Bundan əlavə, yerli memarlar, dizaynerlər və şəhərsalma üzrə mütəxəssislərdən ibarət hədəf qrupu ilə davamlı məşvərətlər həyata keçirilib.
