https://innews.az/uploads/news/2023-06/_innews_e7002633c9d1583cfe895bd6f_o.jpg
Kolumbiyanın geniş oxuyucu kütləsinə malik “El Nuevo Siglo” (“Yeni Əsr”) qəzetində “Azərbaycanın göz qamaşdıran paytaxtı, Bakı ilə tanış ol” sərlövhəli məqalə dərc edilib. Qəzetin həm çap, həm də elektron versiyasında nəşr edilmiş məqalədə ölkəmizin keçdiyi uğurlu inkişaf yolundan və təqdim etdiyi geniş turizm imkanlarından bəhs olunub.
Məqalədə Azərbaycanın həm müasirliyi, həm də qədimliyi ilə möhtəşəm vəhdət təşkil etdiyi, əlverişli iqlim şəraitinə və zəngin təbiətə malik olduğu, o cümlədən mədəniyyətlər qovşağı olan Bakı şəhərinin gözəlliyi və qonaqpərvərliyi ilə insanı valeh etdiyi qeyd olunur.
Bildirilir ki, Azərbaycan Hökuməti tərəfindən elektron viza sisteminin tətbiqi xaricilər üçün bu füsunkar turizm məkanına səyahəti xeyli asanlaşdırır. Məhz Odlar yurdu Azərbaycanda Müsəlman şərqində ilk parlamentli və dünyəvi respublikanın elan edilməsinə, ilk dəfə olaraq qadınlara seçki hüququnun verilməsinə diqqət çəkilir. Papa Fransiskin “Azərbaycan əsl tolerantlıq nümunəsidir” sözlərinə yer verilir və Azərbaycanın müxtəlif dinlərin, mədəniyyətlərin əsrlər boyunca harmoniya şəraitində yaşadığı bir ölkə kimi tanındığı qeyd olunur.
Yazıda, müstəqillik əldə etdikdən sonra Azərbaycanın böyük inkişaf və tərəqqiyə imza atdığı, zəngin təbii ehtiyatlara malik ölkəmizin Avropanın enerji təhlükəsizliyində mühüm rol oynadığı və Avrasiyanın “enerji və nəqliyyat” xəritəsini bütünlüklə dəyişməyə nail olduğu qeyd olunur. Vurğulanır ki, müasir Azərbaycan tarixinin bütün dövrü Heydər Əliyevin adı ilə bağlıdır və Azərbaycan xalqı “Heydər Əliyev İli” çərçivəsində Ümummilli Liderinin anadan olmasının yüzilliyini böyük sevgi və ehtiramla yad edir.
Məqalədə, həmçinin Bakıda yerləşən tarixi-mədəniyyət abidələri – Qız qalası, Bibi-Heybət məscidi, “Alov qüllələri”, Heydər Əliyev Mərkəzi – haqqında ətraflı məlumat verilir.
