https://innews.az/uploads/news/2024-03/_innews_f98c065a9c4fb73671477c131_o.jpg
Azərbaycan Respublikasının ekologiya və təbii sərvətlər naziri Muxtar Babayev Türkiyəyə səfəri çərçivəsində bu ölkənin rəsmiləri ilə bir sıra görüşlər keçirib.
Nazir “Sıfır tullantı” layihəsinin təşəbbüskarı, Birinci xanım Əminə Ərdoğan tərəfindən qəbul edilib. Görüşdə Azərbaycanın COP29 konfransına ev sahibliyindən məmnuniyyət ifadə edilib və əməkdaşlıq sahələrinə dair fikir mübadiləsi aparılıb. Ə.Ərdoğan iki ölkə arasında dostluq və qardaşlıq münasibətlərinə toxunaraq bütün məsələlərdə olduğu kimi bu mötəbər tədbirin təşkilində də Türkiyənin Azərbaycanın yanında olduğunu və lazımi dəstəyi verməyə hazır olduğunu bildirib.
Türkiyənin kənd təsərrüfatı və meşəçilik naziri İbrahim Yumaklı ilə keçirilən görüşdə iki ölkə arasında kənd təsərrüfatının və meşəçiliyin inkişafı ilə bağlı əməkdaşlıq perspektivləri müzakirə edilib, COP çərçivəsində su təsərrüfatı, təbiət və meşələrin qorunması məsələləri ətrafında müzakirələr aparılıb.
Türkiyənin ətraf mühit, şəhərsalma və iqlim dəyişikliyi naziri Məhmət Özhaseki ilə görüşdə COP29 çərçivəsində iki ölkə və üzv olduqları beynəlxalq təşkilatlar səviyyəsində müvafiq sahələrdə əməkdaşlığa dair fikir mübadiləsi aparılıb, həmçinin COP29 konfransı ilə bağlı prioritetlər və əməkdaşlıq imkanları ələ alınıb.
Nazir Muxtar Babayevin Türkiyənin energetika naziri Alparslan Bayraktar ilə görüşünün əsas müzakirə mövzusu isə “yaşıl enerji” və bərpaolunan enerji, həmçinin emissiyaların azaldılması, mədən və ənənəvi enerji ehtiyatlarının işlədilməsinin təbiətə verə biləcəyi zərərlərin neytrallaşdırılması sahəsində əməkdaşlıq imkanları olub.
