https://innews.az/uploads/news/2024-04/_innews_1bd44bf7744eccb708520064a_o.jpg
Azərbaycanın Polşadakı Səfirliyinin təşkilatçılığı və Polşa Müsəlmanları İttifaqının dəstəyi ilə Polşanın Belostok şəhərində iftar süfrəsi təşkil olunub. İftar süfrəsində Polşa müftisi Tomaş Miskeviç başda olmaqla, Polşa Müsəlmanları İttifaqı, diplomatik missiyaların nümayəndələri, mədəniyyət qurumlarının rəhbərləri, yerli tatar icmasının təmsilçiləri, o cümlədən şəhərin müsəlman sakinləri və müxtəlif ölkələrdən tələbələr iştirak ediblər.
Polşanın müftisi T.Miskeviç çıxış edərək həmrəylik, dostluq, qardaşlıq və xeyirxahlıq baxımından iftar təşəbbüsünün əhəmiyyətini qeyd edib. O, Polşanın müsəlman əhalisi arasında Azərbaycana münasibətdə yaranmış rəğbəti vurğulayıb.
Azərbaycan və Polşada, eləcə də bütün dünyada müsəlmanların sülh, xeyriyyəçilik və tolerantlıq kimi ümumbəşəri dəyərləri qeyd etmək məqsədilə digər dinlərlə birlikdə iftar süfrələri açdığını bildirən səfir Nərgiz Qurbanova Ramazan ayının İslam aləmi, o cümlədən Azərbaycan xalqı üçün önəmini vurğulayıb. Səfirin nitqi zamanı İslam sivilizasiyasının tarixi-mədəni mərkəzlərindən biri olan ölkəmizdə Ramazan bayramının hər il qürurla qeyd olunduğu ifadə olunub. Azərbaycanın çoxmillətli və çoxkonfessiyalı ölkə, mədəniyyətlərarası dialoq məkanı kimi tanındığı, milli mənsubiyyətindən, dilindən və dinindən asılı olmayaraq multikulturalizm və tolerantlığın Azərbaycan xalqının gündəlik həyatının ayrılmaz hissəsi olduğu vurğulanıb. Bu xüsusda, 1-3 may tarixlərində Bakıda 6-cı Ümumdünya Mədəniyyətlərarası Dialoq Forumunun keçiriləcəyi xatırlanaraq milli sərhədləri aşan qlobal problemləri müzakirə etmək üçün dünya liderlərinin, beynəlxalq təşkilatların və vətəndaş cəmiyyəti nümayəndələrinin Azərbaycanda bir araya gələcəkləri bildirilib.
Səfir daha sonra Azərbaycan ərazilərinin 30 illik işğalı nəticəsində 67 məscid və İslam mədəni irsinin dağıdılmasından bəhs edib. Azərbaycanın ərazi bütövlüyünü bərpa etməsindən sonra Şuşanın tarixi Yuxarı Gövhər Ağa məscidindən yenidən əzan sədalarının yüksəlməsini fərəhlə vurğulayıb. İslam Əməkdaşlıq Təşkilatının Şuşa şəhərini 2024-cü ildə İslam dünyasının mədəniyyət paytaxtı elan etdiyini qeyd edən N.Qurbanova qonaqları iftar süfrəsindən sonra Səfirlik tərəfindən bu münasibətlə təşkil olunmuş fotosərgiyə baxmağa dəvət edib.
Belostok məscidində baş tutan iftar məclisində qonaqlara yerli təamlarla yanaşı, Azərbaycan şirniyyatları ilə çay süfrəsi açılıb.
