https://innews.az/uploads/news/2024-05/_innews_a06ed7d2b8296789b38239572_o.jpg
Ümummilli Lider Heydər Əliyevin anadan olmasının 101-ci ildönümü ilə əlaqədar Ordubad rayonunda “Sehrli Ordubad” adlı fotosərgi açılıb.
Peşəkar fotoqraf Aydın Mehdiyev tərəfindən ərsəyə gətirilən sərgi Ordubad Rayon Mədəniyyət Sarayının foyesində təşkil olunub. Sərginin açılışında Ordubad Rayon İcra Hakimiyyətinin başçısı Rəcəb Rəhimli, icra hakimiyyətinin əməkdaşları, hüquq-mühafizə orqanları, idarə, müəssisə və təşkilatların məsul şəxsləri iştirak ediblər.
Çıxışlarda sərginin əhəmiyyəti vurğulanıb, incəsənətə və rəssamlığa böyük önəm verən Heydər Əliyev dühasının “Azərbaycanın incisi” adlandırdığı Ordubad rayonuna, onun təbiətinə və digər özəlliklərinə olan xüsusi münasibəti diqqətə çatdırılıb.
Azərbaycan Fotoqrafları Birliyinin sədri Amira Süleyman Ordubad rayonu və təşkil olunan sərgi haqqında təəssüratını bölüşüb, tədbirin yüksək səviyyədə təşkilinə görə minnətdarlığını bildirib.
Sonra iştirakçılar sərgi ilə yaxından tanış olublar. Təqdim edilən materiallar böyük maraqla qarşılanıb.
