https://innews.az/uploads/news/2024-12/_innews_e3eaacb96a04c90ca727a12ea_o.jpg
Dekabrın 6-da saat 19:00-da Azərbaycan Milli İncəsənət Muzeyində Xalq rəssamı, milli heykəltəraşlıq məktəbinin görkəmli nümayəndəsi Mirəli Mirqasımovun 100 illik yubileyinə həsr olunmuş “Mirəli Mirqasımov: daşın poetikası” adlı xatirə gecəsi keçiriləcək.
Heykəltəraş yarım əsrdən çox davam etmiş sənət yolu ərzində yüksək bədii-estetik xüsusiyyətlərə malik bir çox büst, portret əsərləri və monumental heykəltəraşlıq abidələri ərsəyə gətirib. Mirəli Mirqasımovun yaradıcılığının əsas cəhətləri kimi mükəmməl obraz həllini, surətlərin fərdi və ümumiləşdirilmiş formada peşəkarlıqla təqdim edilməsini vurğulamaq olar. Onun dəzgah heykəltəraşlığı sahəsində yaratdığı əsərlər poetizm və zahiri statikliklə, monumental heykəltəraşlıq abidələri isə dinamizm, daxili ekspressivliklə, düşünməyə vadar edən dolğun daxili aləmlə seçilirlər.
Sənətkara həsr olunmuş gecədə həyat və yaradıcılığı haqqında çıxışlar, sənət yoldaşları olmuş heykəltəraş və rəssamların xatirələri dinləniləcək.
Tədbirdə, həmçinin Mirəli Mirqasımovın Azərbaycan Milli İncəsənət Muzeyinin kolleksiyasına aid 3 heykəltəraşlıq əsəri – tanınmış rəssam, Azərbaycan teatr-dekorasiya sənətinin yaradıcılarından biri Rüstəm Mustafayevin qız övladını əks etdirən “Qız büstü”, SSRİ Xalq artisti Vladimir Abramoviç Etuşun həyat yoldaşı Nina Aleksandrovna Kraynovaya həsr edilmiş “Tələbə qızın portreti” və “Qız göyərçin ilə” büstü sərgilənəcək.
Qeyd edək ki, təqdim edilən əsərlər ilin sonunadək muzeydə nümayiş olunacaq.
