https://innews.az/uploads/news/2025-02/_innews_360a94b76b3b6c48b5fa73be1_o.jpg
Xocalı faciəsinin 33-cü ildönümü ilə əlaqədar Meksika Deputatlar Palatasının rəhbərliyinin dəstəyi, Azərbaycanın Meksikadakı Səfirliyinin və “Arts Council Azerbaijan” qeyri-hökumət təşkilatının birgə təşkilatçılığı ilə mötəbər San Lazaro Qanunvericilik Sarayında – Deputatlar Palatasında ölkəmizin görkəmli rəssamı Nazim Məmmədovun Xocalı qurbanlarının əziz xatirəsinə həsr edilmiş rəsm irsini əhatə edən “Xocalı fəryadı” adlı sərgi təşkil edilib.
Sərgidə Meksika Konqresinin üzvləri deputatlar Eden Qarses Medina, Klara Kardenas Qalvan, Ruben İqnasio Moreira, Mario Migel Kariyyo, Meksika Deputatlar Palatasının digər üzvləri, bu ölkədə akkreditə olunmuş diplomatik missiya rəhbərləri və üzvləri, yerli media və QHT-lərin nümayəndələri iştirak edib.
Sərgidə açılış nitqi ilə çıxış edən səfir M. Talıbov ilk öncə sərginin əhəmiyyətini vurğulayaraq sərginin müasir Azərbaycan tarixinin ən kədərli səhifələrindən biri olan, günahsız mülhi əhaliyə qarşı törədilmiş amansız Xocalı soyqırımının qurbanlarına ehtiramın bir nümunəsi olduğunu və həmin faciənin tarixini beynəlxalq ictimaiyyətə çatdırmaq məqsədi daşıdığını qeyd edib.
Daha sonra çıxışında Xocalı soyqırımının acı nəticələri barədə qonaqları məlumatlandıran diplomat soyqırımı törədənlərin ədalət qarşısına çıxarılmasının, beynəlxalq səviyyədə pislənməsinin, həmçinin törədilən faciəyə ədalətli hüquqi və siyasi qiymətin verilməsinin vacibliyindən danışıb.
Xocalı soyqırımının unudulmamasının əhəmiyyətini qeyd edən səfir, bu gün hər bir azərbaycanlının soyqırımı qurbanlarının xatirəsini yaşatdığını və onların səsini dünyaya çatdırmaq üçün əllərindən gələni əsirgəmədiklərini, ədalət bərpa olunana qədər Xocalı qurbanlarının səsinin uca tutulacağını bildirib. Bu xüsusda, ədalətin bərpa olunması və bu kimi cinayətlərin bir daha təkrarlanmasının qarşısının alınması üçün “Xocalıya ədalət!” beynəlxalq təbliğat-təşviqat kampaniyasının əhəmiyyətindən bəhs edib.
Səfir M.Talıbov, həmçinin çıxışında bir sıra ölkənin parlamentləri, o cümlədən Meksika Konqresinin hər iki palatası tərəfindən Xocalı soyqırımını pisləyən və bu faciəyə ədalətli qiymət verən sənədlərin qəbul edildiyini xüsusi vurğulayıb. O, bu addımın beynəlxalq ədalətin təmin olunmasında və Xocalı qurbanlarının xatirəsinin yaşadılmasında mühüm rol oynadığını diqqətə çatdıraraq bu məsələdə göstərdiyi ədalətli yanaşma və həmrəyliyə görə Meksika tərəfinə təşəkkürünü bildirib.
Çıxışında habelə, diplomat Prezident İlham Əliyev tərəfindən işğaldan azad edilmiş Xocalı şəhərində Azərbaycanın dövlət bayrağının qürurla qaldırıldığını, bununla da xalqımızın faciə qurbanlarını heç vaxt unutmamaq əzminin əbədiləşdirildiyini, bu gün orada dalğalanan üçrəngli bayrağımızın faciə qurbanlarının qanının yerdə qalmadığının canlı sübutu olduğunu diqqətə çatdırıb.
Səfir, həmçinin, uzun illər davam edən işğaldan sonra ölkəmiz tərəfindən məcburi köçkünlərin öz doğma torpaqlarına ləyaqətlə qayıtmasını təmin etmək üçün görülən işlərdən söz açıb. Böyük Qayıdış Proqramı çərçivəsində bu gün Xocalı sakinlərinin öz evlərinə ləyaqətlə qayıtdığını və uzun illər boyunca böyük əzablar yaşamış Xocalının yenidən cənnətə çevrildiyini bildirib. Səfir, çıxışında 1988-1991-ci illər arasında Ermənistandan qovulmuş azərbaycanlıların da öz evlərinə qayıtmaq hüququnu müdafiə edərək, bir gün onların da ləyaqətli və təhlükəsiz şəkildə öz evlərinə qayıdacaqlarına ümidvarlığını ifadə edib.
Ardınca çıxış edən Meksika Konqresinin üzvü Eden Qarses Medina öz növbəsində iştirakçılara mülki əhaliyə qarşı törədilmiş amansız faciə barədə danışaraq, Xocalı soyqırımı qurbanlarının xatirəsinin sönmədiyini və bu il də, hər il olduğu kimi, Azərbaycan xalqının ədalət tələb etmək üçün səsini ucaltdığını qeyd edib. O, bu faciənin unudulmasına və qurbanların yaddaşının susmasına icazə verilməməli olduğunu vurğulayıb. E.Q. Medina, bu gün Meksika Deputatlar Palatasında bu sərgi vasitəsilə, Azərbaycana, o cümlədən zorakılıq və ədalətsizlik qurbanı olmuş bütün insanlara həmrəyliyini ifadə edib. Dünya vətəndaşları olaraq, belə faciələrin təkrarlanmasına yol verməmək məsuliyyətimizin olduğunu bildirən E.Q. Medina, sülhün yalnız həqiqət, tanıma və insan hüquqlarına hörmət əsasında qurula biləcəyini qeyd edib. Sonda isə, o, faciəni unutmamağa və təkrarlanmasına yol verməməyə çağırıb.
Tədbirdə, həmçinin çıxış edən deputat Ruben İqnasio Moreira sərgidə iştiraka dəvətə görə Azərbaycan tərəfinə təşəkkürünü bildirərək, insan hüquqlarına hörmətin əhəmiyyətindən, bu xüsusda bu kimi faciələrin bir daha yaşanmamasının vacibliyindən söz açıb.
Sonda “Arts Council Azerbaijan” qeyri-hökumət təşkilatının rəhbəri Dadaş Məmmədov qonaqları azərbaycanlı rəssam Nazim Məmmədovun Xocalı faciəsinə həsr edilmiş yaradıcılıq irsi barədə məlumatlandırıb.
Qonaqlar tərəfindən maraqla qarşılanmış sərgidə iştirakçılara Xocalı faciəsinin tarixindən bəhs edən broşür və materiallar təqdim olunub.
