https://innews.az/uploads/news/2025-03/_innews_931c62f036dd9d876580a1306_o.jpg
Azərbaycanın yaşıl texnologiya startapı “Green Public” Yaxın Şərqin nüfuzlu texnologiya konfransları olan “Web Summit Qatar 2025” və “Step Dubai 2025”da iştirak edib. Startapın həmtəsisçiləri Tural Yusifov, Əli Xəyyam və Ramin Səfərov Dubay və Dohada baş tutan sərgilərdə potensial investorlarla görüşlər keçirib, startapın təklif etdiyi texnoloji, xüsusilə də süni intellekt əsaslı ekoloji həllərini geniş auditoriyaya təqdim ediblər.
Bu texnoloji tədbirlər hər il böyük şirkətləri, investorları, texnologiya sahəsində tanınmış simaları bir araya gətirir. “Web Summit Qatar 2025” ümumilikdə 25 mindən çox iştirakçı cəlb edib. Həmtəsisçi Tural Yusifov bildirib ki, nüfuzlu qlobal sammitlərdə iştirak Azərbaycan startapı üçün potensial investisiya, bazar və şəbəkələşmə imkanlarına çıxış baxımından böyük önəm kəsb edir:
“Düşünürəm ki, “Web Summit” bizə yeni imkanlar yaradır: startapımız qlobal texnologiya icmasında tanınmağa başlayacaq, rəqəmsal məhsulumuzun potensial bazarlara və investisiya resurslarına çıxışı üçün yeni perspektivlər açılacaq”.
Startap şəhadətnaməsinə sahib olan “Green Public” yaşıl texnologiyaları inkişaf etdirən startaplar üçün nəzərdə tutulumuş və Türkiyənin tanınmış “Viveka” şirkətinin həyata keçirdiyi “4+1 ClimAccelerator” akselerasiya proqramında da iştirak etmişdir. Startap, həmçinin Azərbaycan ekosistemininin bir çətir altında formalaşmasına və inkişafına təkan verən İnnovasiya və Rəqəmsal İnkişaf Agentliyi (İRİA) ilə əməkdaşlıq imkanlarını da nəzərdən keçirir.
Qeyd edək ki, “Green Public” iqlim dəyişikliyinin əsas səbəblərindən birinə çevrilmiş yaşıllıqların və meşə sahələrinin azalması probleminə sıfır karbon izi ilə həllər təklif edir. Belə ki, platforma sayəsində istifadəçilər yaşadıqları ərazidə və ya şəhərin uyğun hissələrində ağac əkmək üçün uyğun yerlər tapa, ağacəkmə və təmizlik kampaniyaları başlada bilərlər. Platforma yaşıllaşdırmaya cavabdeh olan dövlət qurumları ilə bu işə töhfə vermək niyyətində olan şirkətləri, QHT-ləri və digər istifadəçiləri bir araya gətirir. Bununla yanaşı, platformada müvafiq təchizatçılarla əlaqə qurmaq və ağac əkənlərə ianə etmək mümkündür.
