https://innews.az/uploads/news/2026-11/_innews_0e67197dcef3a129bee08928c_o.jpg
ADPU-nun elmi işçisi və müəllimi Aynurə Əliyevanın qələmə aldığı “Turanım mənim!” şeiri türk xalqlarının ortaq tarixi, milli kimliyi, qardaşlığı və birlik ideyasını poetik dillə ifadə edir.
Şeirdə Azərbaycan, Türkiyə, Qazaxıstan, Qırğızıstan, Türkmənistan, Özbəkistan, eləcə də digər türk xalqlarının ortaq köklərinə və mənəvi bağlılığına diqqət çəkilir. Müəllif Turan anlayışını yalnız coğrafi məkan kimi deyil, həm də ortaq tarix, yaddaş, mədəniyyət və mənəvi dəyərlərin rəmzi kimi təqdim edir.
Əsərdə Təbriz və Bakıdan Ankara və Altaya qədər uzanan coğrafiya türk dünyasının bütövlüyünü, Göy Tanrı, Oğuz, Qıpçaq və Qarluq kimi tarixi-mədəni anlayışlar isə ortaq keçmişin izlərini əks etdirir.
Aynurə Əliyeva misralarında birlik, həmrəylik, milli qürur və gələcəyə inam motivlərini ön plana çəkir. “Turanım mənim!” şeiri müəllifin türk dünyasına sevgi və bağlılığını ifadə edən poetik müraciət kimi diqqət çəkir.
Turanım mənim!
Aynurə ƏLİYEVA
ADPU elmi işçi, müəllim
Qazax qardaşımdır, Qırğız dayağım,
Türkmən - ocağımdır, Özbək - çırağım.
Hər qarış torpağın - ana qucağım,
Sarsılmaz elimsən, Turanım mənim!
Təbrizin həsrəti, Bakının canı,
Ankara türklüyün şöhrəti, şanı.
Damarda dövr edər türkün saf qanı,
Çağlayan selimsən, Turanım mənim!
Uyğur qan yaddaşım, tarixim, köküm,
Tatar iradəmdir, bitməz dözümüm.
Səninlə yüngüldür hər ağır yüküm,
Doğan Günəşimsən, Turanım mənim!
Altaydan gəlirəm, yolum uzaqdır,
Mən türk oğlu türkəm, sözlərim haqdır.
Türkün gələcəyi daim parlaqdır,
Sönməz məşəlimsən, Turanım mənim!
Göy türkün tuğusan, tarixin izi,
Bir ana bətnində böyütdün bizi.
Birliyə şövq etdin coşqun dənizi,
İgidlik rəmzimsən, Turanım mənim!
Bir kökdən su içən uca çinarıq,
Biz haqqa söykənən polad divarıq.
Dünya sarsılsa da, biz sarsılmarıq,
Tükənməz sevgimsən, Turanım mənim!
Göy Tanrı qorusun bu şanlı soyu,
Oğuzun, Qıpçağın, Qarluğun boyu.
Bir olsun bayramı, bir olsun toyu,
Vurulan möhrümsən, Turanım mənim!
Bu eşqlə ucaldıq, bu andla varıq,
Biz sönməz işığıq, bitmez baharıq.
Adınla hər zaman qürurlanarıq,
Müqəddəs dinimsən, Turanım mənim!
Qopuzlar dinlənsə, dastan canlanar,
Turan nərə çəksə, dağ çalxalanar.
Bir bayraq altında ellər toplanar,
Bütöv Vətənimsən, Turanım mənim!
Göy Tanrı ucaltsın uca taxtını,
Daim açıq tutsun türkün baxtını.
Qoy yazsın türklüyün şanlı vaxtını,
Gücüm, kimliyimsən, Turanım mənim!
Əyilməz vüqarım, dəmir biləyim,
Sən döyünən nəbzim, vuran ürəyim!
Tanrıdan tək arzum, uca diləyim,
Ana məsgənimsən, Turanım mənim!
Aynurəyəm, hər misram bir nəğmədir,
Müqəddəs bayrağım zirvələrdədir,
Tarixim, salnaməm daş sinəndədir,
Şanlı zəfərimsən, Turanım mənim!
Ən son xəbərləri səhifəmizdən də izləyin
