https://innews.az/uploads/news/2025-03/_innews_48b8db583006f851a53692d7d_o.jpg
İKT sahəsində karyera qurmaq və qlobal sertifikatlar qazanmaq istəyənlər üçün yeni fürsət təqdim edilir.
İnnovasiya və Rəqəmsal İnkişaf Agentliyi (İRİA) ilə "StrategEast"in birgə təşəbbüsü və “Oracle” Universitetinin tərəfdaşlığı ilə həyata keçirilən ödənişsiz “Digital LevelUP” proqramının ikinci dalğasına start verilir.
Proqram çərçivəsində iştirakçılar “Data Science”, “DevOps” və “Cloud Operations & Data Management” istiqamətlərində 4 ay ərzində intensiv təlimlər keçəcək. Ümumilikdə, 200-dən çox iştirakçının proqramda iştirakı nəzərdə tutulur və hər dalğada minimum 70 mütəxəssisin yetişdirilməsi hədəflənir. Dərslər “özü öyrənmə” metodu ilə onlayn formada həyata keçiriləcək. İştirakçılar təlim müddətində mentor dəstəyi ilə təmin olunacaqlar.
Proqrama ingilis dili bilikləri, həmçinin kompüter elmləri üzrə fundamental biliklərə malik 3-cü və 4-cü kurs bakalavr tələbələri və magistrantlar müraciət edə bilərlər.
Tamamilə ödənişsiz olan bu proqramda tələbələr "OCI Foundation Associate", "Oracle Cloud Infrastructure Data Foundations Associate", "OCI AI Foundation Associate" kimi beynəlxalq sertifikat imtahanlarına pulsuz giriş imkanı qazanacaq, həmçinin rəqəmsal transformasiya sahəsində qlobal standartlara uyğun bacarıqlarla rəqabət üstünlüyü əldə edəcəklər. Proqramda yüksək nəticə göstərən tələbələr qeyd olunan sertifikatlara əlavə olaraq, Oracle Cloud Professional imtahanına da giriş imkanı əldə edəcəklər.
Qeydiyyat linki: https://education.strategeast.org/
Son qeydiyyat tarixi: 01.04.2025
Qeyd edək ki, “StrategEast” beynəlxalq maliyyə institutları, inkişaf agentlikləri, qlobal texnoloji şirkətlər və dövlət qurumları ilə əməkdaşlıq edən, Avrasiyanın rəqəmsal iqtisadiyyatına dəstək göstərən nüfuzlu təşkilatdır. Bu əməkdaşlıq vasitəsilə proqram iştirakçılarına qlobal standartlara uyğun bilik və təcrübə qazandırılacaq.
