https://innews.az/uploads/news/2025-03/_innews_c2dc048c1ac699c4e8fee3b43_o.jpg
Martın 18-də Birləşmiş Ərəb Əmirliklərinin (BƏƏ) Azərbaycandakı səfirliyi tərəfindən Bakıda iftar süfrəsi təşkil edilib.
innews.media xəbər verir ki, səfirliyin müvəqqəti işlər vəkili Xalid Al Tunaiji iftar süfrəsinə gələnləri müqəddəs Ramazan ayı münasibətilə səmimi-qəlbdən təbrik edərək, bu ayın mahiyyəti, mənəvi əhəmiyyəti və insanlara qazandırdığı dəyərlər barədə danışıb. O, Ramazan ayının müsəlmanlar üçün böyük önəm daşıdığını vurğulayaraq, Birləşmiş Ərəb Əmirlikləri xalqının bu ayda riayət etdiyi xüsusi adət-ənənələr, dini ayinlər və xeyriyyəçilik ənənələri haqqında ətraflı məlumat verib. Xalid Al Tunaiji, eyni zamanda, bu mübarək ayda edilən duaların, tutulan orucların və qılınan namazların Allah dərgahında qəbul olunmasını ürəkdən diləyib, hər kəsə xeyir, bərəkət və əmin-amanlıq arzulayıb.
Bu mübarək ayda Birləşmiş Ərəb Əmirliklərində İslam dəyərləri və dərin sosial bağlar özünü büruzə verir. Ramazan ayına hazırlıq onun gəlişindən əvvəl başlayır, məscidlər və məclislər bəzədilir, mehribanlıq və tolerantlıq mühiti güclənir. Xüsusi olaraq vurğulanıb ki, BƏƏ xalqı Ramazanı yüksək mənəviyyatla, Qurani-Kərim tilavəti, ibadətləri artırmaq və xeyirxah işlər görmək istəyi ilə qarşılamağa can atır. Ramazan ayına xas olan adət-ənənələrdən biri "musaharati" adətidir ki, burada insanlar sahura oyadılır. Həmçinin, iftarın başlandığını bildirmək üçün günəş batdıqda top atəşi açılması ənənəsi qorunur.
Kollektiv iftar süfrələri təşkil etmək BƏƏ-də Ramazanın mühüm adətlərindən biri kimi qeyd olunur. Məscidlərdə və ictimai yerlərdə qurulan bu süfrələrə milliyyətindən və mədəniyyətindən asılı olmayaraq hər kəs dəvət edilir. Həmçinin, Ramazan ayında ailə ziyafətlərinin sayı artır və ailə üzvləri iftar süfrəsi ətrafında bir araya gəlirlər. Küçələr və ticarət mərkəzləri fənərlərlə bəzədilir, “xeyl” və “qamari” kimi ənənəvi oyunlar keçirilir ki, bunlar da BƏƏ-nin mədəni irsini yaşatmaq məqsədi daşıyır.
Tədbirdə, həmçinin, BƏƏ-nin Ramazan ayına xas olan adət-ənənələri, ibadətləri və bu müqəddəs ayın xüsusi atmosferini əks etdirən videoçarx təqdim olunub. Daha sonra müvəqqəti işlər vəkili Xalid Al Tunaiji Azərbaycan-BƏƏ parlamentlərarası əlaqələri üzrə işçi qrupunun rəhbəri Cavanşir Paşazadəyə səfirlik adından xatirə hədiyyəsini təqdim edib.
Ramazan ayı BƏƏ üçün sadəcə oruc tutulan ay deyil, həm də adət-ənənələrin təbliği, ictimai əlaqələrin gücləndirilməsi və xeyirxahlıq və sülhün yayılması üçün bir fürsətdir. Uca Allahdan bu ayın insanlara xeyir və bərəkət gətirməsini diləyirik.
