https://innews.az/uploads/news/2025-04/_innews_8b8858597c2ebd9fa8b579f25_o.jpg
Birləşmiş Ərəb Əmirliklərinin Bakıdakı səfirliyinin həm-təşkilatçısı olduğu BINGHATTI ÖZBAHÇECİ İNVESTİSİYA ZİRVƏSİ keçirilib. “Xəyallardan Qlobal Gələcəyə” İnvestisiya və İnnovasiya Platforması tədbirində çıxış edən səfir Mohammed Al Blooshi vurğuladı ki, BƏƏ və Azərbaycan qarşılıqlı hörmət və ümumi baxış əsasında qurulan güclü və inkişaf edən tərəfdaşlığa sahibdir: “Bu illər ərzində ikitərəfli əlaqələrimiz xüsusilə ticarət, enerji, infrastruktur və bərpa olunan enerji sahələrində əhəmiyyətli dərəcədə inkişaf etmişdir. Bu gün biz bu əməkdaşlığı daha da genişləndirmək, investisiya və iqtisadi artım üçün yeni perspektivlər açmaq üçün böyük imkanlara malik mühüm məqamdayıq”.
Səfir qeyd edib ki, 1971-ci ildə yarandığı gündən BƏƏ ərəb dünyasının iqtisadi paytaxtı kimi özünü təsdiq etmişdir. BƏƏ regionda həm regional, həm də qlobal miqyasda investisiya və ticarət fəaliyyətinin ürəyi hesab olunur.
BƏƏ investisiya və ticarət üçün ideal yerdir. BƏƏ dinamik mədəniyyət, Şərq-Qərb ticarət marşrutu boyunca geostrateji mövqe, investorlar üçün əlverişli qanunvericilik, sabit, təhlükəsiz mühit, innovasiya sistemi, inteqrasiya olunmuş məlumat ekosistemləri və ultra müasir rəqəmsal infrastruktura malikdir.
İnfrastruktur keyfiyyətinə görə qlobal miqyasda 4-cü yerdə (Qlobal Rəqabətlilik Hesabatı 2023) olan BƏƏ regionda Makroiqtisadi Sabitlik üzrə Birincidir.
BƏƏ insan kapitalının inkişafı, səhiyyə, sənaye istehsalı, logistika, qabaqcıl texnologiya və bərpa olunan enerji kimi əsas sənayelərin rolunu, telekommunikasiya, süni intellekt, kibertəhlükəsizlik, 3D çap, robototexnika və digər sektorlarda investisiya imkanlarını artırmaq üçün fəal şəkildə səylər göstərir.
Səfir Al Blooshi Azərbaycandan olan investorları BƏƏ-dəki bu investisiya imkanlarından yararlanmağa dəvət etdi.
