https://innews.az/uploads/news/2025-06/_innews_7a37ed4140e4c9132c5f159aa_o.jpg
Hazırda ölkəmizdə ali məktəblərə hazırlaşan minlərcə abuturiyent var. Onların hər biri tələbə adını qazanmaq üçün Dövlət İmtahan Mərkəzinin keçirdiyi imtahanlarda iştirak edirlər. İmtahanlarda uğur əldə edərək, müəyyən bal toplayan şagirdlərin növbəti işi doğru ixtisas və doğru universitet seçmək olur ki, bu faktor da, onların gələcək həyatı üçün böyük önəm kəsb edir.
Bəzi abuturiyentlər maraq dairələrinə uyğun ixtisas müəyyənləşdirsələr də, müvafiq ixtisas üzrə hansı universitetdə, dövlət və ya özəl, təhsil alacaqları mövzusunda qərarsız qalırlar.
Universitet seçərkən bir neçə amili nəzərə almaq lazımdır. Əks halda yalnış seçim nəticəsində yüzlərlə şagird gələcəkdə həm tələbə, həm də iş həyatında ciddi nöqsanlarla üzləşə bilər. Əvvəlcə, abituriyent dövlət və ya özəl universitetdə təhsil almaq istədiyini müəyyənləşdirməlidir. Nəzərə alaq ki, özəl universitetlər dövlətdən asılı olmayaraq müstəqil şəkildə fəaliyyət göstərirlər. Bu isə onların daxili qayda-qanunlarının sırf universitet rəhbərliyi tərəfindən müəyyənləşdirilməsi deməkdir. Bu tip universitetlərdə bəzən tələbə təqaüdünün verilməsində problemlər yarana bilər. Bundan əlavə olaraq ali məktəblərdə ödənişli əsaslarla təhsil alan bəzi tələbələr var ki, onlar əhalinin həssas qrupuna daxildirlər. Bu qrupun nümayəndələri üçün dövlət universitetləri müəyyən güzəştlər nəzərdə tutur, lakin özəl universitetlərin bəzilərində bu imtiyazlar mümkün olmaya bilər. Onu da qeyd edək ki, dövlət universitetləri bir başa dövlətin təlimatlarına tabe olduqları üçün onların fəaliyyətində hər hansı bir problem yaranmır, yəni istər bakalavr, istər magistratura, istər doktorantura dönəmində tələbə təhsil ocağının bağlanması kimi bir hal ilə üzləşmir. Özəl universitetlər də isə bu mövzu olduqca aktualdır, yəni universitetin bağlanma təhlükəsi var. Məsələn, 1997-cü ildə yaradılan "Azərbaycan Beynəlxalq Universiteti" 2010-cu ilin avqustunda fəaliyyətini dayandırmışdır. Universitet bağlandıqdan sonra bir sıra tələbələr sosial şəbəkələrdə diplom ala bilmədiklərini iddia edirdilər. Azərbaycan Beynəlxalq Universitetindən başqa Təfəkkür Universiteti, Bakı Asiya Universiteti və s kimi özəl təhsil müəssisələri də fəaliyyətlərini dayandıran ali məktəblərdir.
Sadaladığımız bu faktorları nəzərə alsaq, dövlət universitetlərində təhsil almağın daha məntiqli addım olduğunu deyə bilərik. Əlbəttə, ölkəmizdə fəaliyyən göstərən nüfuzlu özəl ali məktəblər mövcuddur, lakin yüz faiz qarantiya əldə etmək istəyirsinizsə, dövlət universitetlərinə üz tutmağınız daha məqsədə uyğun olardı.
Məmmədli Maarif, BDU jurnalistika fakültəsinin tələbəsi
