https://innews.az/uploads/news/2022-09/_innews_083e9ea6a385ac0e8338706dd_o.jpg
Bu münasibətlə Azərbaycanın İrandakı səfirliyində təşkil olunmuş Anım Günü mərasimində İran ictimaiyyətinin nümayəndələri, diplomatlar, ziyalılar və Tehranda yaşayan azərbaycan vətəndaşları iştirak etmişlər.
Mərasim iştirakçıları Anım Günü münasibəti ilə səfirlikdə təşkil olunmuş erməni qəsbkarlarının vaxtilə işğal etdiyi Azərbaycan ərazilərində törətdikləri dağıntıları, hərbi cinayətləri, eləcə də 44 günlük Vətən Müharibəsi zamanı torpaqlarımızın azadlığı uğrunda həlak olan şəhidlərimizin qəhrəmanlığı və şücaətini əks etdirən “Zəfər Salnaməsinin Unudulmaz Qəhramanları” adlı foto-sərgiyə baxış keçirmiş, erməni silahlı birləşmələrinin Azərbaycana qarşı təcavüz və təxribatlarının fəsadlarına dair məlumatlar almışlar.
Sərgi ilə tanışlıqdan sonra 27 Sentyabr –Anım Günü ilə bağlı Səfirliyimizdə təşkil olunmuş tədbirin açılış mərasimində Azərbaycanın dövlət himni səsləndirilmiş, şəhidlərimizin əziz xatirəsi bir dəqiqəlik sükutla yad edilmiş, onların ruhuna müqəddəs Qurandan ayələr oxunmuşdur.
Tədbirdə çıxış edən Azərbaycanın İrandakı səfiri Əli Əlizadə Azərbaycan Ordusunun Ermənistanın hərbi təcavüzünün və təxribatının qarşısını almaq, həmçinin, mülki əhalinin təhlükəsizliyini təmin etmək məqsədi ilə cavab tədbirlərinə başladığı 27 Sentyabr 2020-ci il gününün Azərbaycan Respublikasının Prezidentinin sərəncamı ilə Azərbaycanın müstəqilliyi, suverenliyi və ərazi bütövlüyü uğrunda canlarını fəda vermiş əziz şəhidlərimizin Anım Günü kimi daxil olduğunu bildirmişdir. Səfir, Silahlı Qüvvələrinin Ali Baş Komandanı cənab İlham Əliyevin rəhbərliyi altında şanlı Azərbaycan Ordusunun Vətən müharibəsində əldə etdiyi Qələbənin Azərbaycan Respublikası tarixinin yeni dövrünü açdığını, ədaləti bərqərar edərək Ermənistanın 30 ilə yaxın davam edən təcavüzünə və Azərbaycan ərazilərinin işğalına son qoyduğunu və hazırda bölgədə dayanıqlı sülhün təmin olunması istiqamətində Azərbaycanın öz səylərini davam etdirdiyini bildirmişdir.
Əli Əlizadə, Azərbaycanın, beynəlxalq hüququn prinsipləri, xüsusilə də suverenlik, ərazi bütövlüyü və beynəlxalq sərhədlərin toxunulmazlığına ciddi riayət olunması əsasında Ermənistan ilə münasibətlərin normallaşdırılmasına hazır olduğunu bildirmiş, lakin Ermənistanın normallaşma prosesini müxtəlif bəhanələrlə ləngitdiyini, beynəlxalq səylərlə aparılan danışıqlarda qeyri-konstruktiv mövqe nümayiş etdirdiyini, müharibə cinayətlərini davam etdirərək Azərbaycan ərazilərində minaların yerləşdirilməsi cəhdləri kimi müxtəlif təxribatlara əl atdığını və bununlada sülh prosesində maraqlı olmadığını nümayiş etdirdiyini vurğulamışdır. Azərbaycan dövlətinin bölgədə dayanıqlı sülh və sabitliyin bərqərar olmasına, işğaldan azad edilmiş ərazilərində genişmiqyaslı bərpa və quruculuq işləri apardığı bir zamanda, Ermənistanın 12-14 Sentyabr tarixlərindəki son təxribatı və Azərbaycana qarşı hücümü, Ermənistanın sülh prosesinə qeyri-konstruktiv yanaşmasını bir daha sübuta yetirdiyini diqqətə çatdırmışdır.
Səfir İranın Azərbaycanla sərhəd ərazilərində yerləşən vilayətlərinin əhalisinin Vətən Müharibəsi dövründə sərhəd kənarına toplaşaraq Azərbaycana göstərdiyi mənəvi dəstəyinin, eləcə də 30 ilə yaxın davam etmiş münaqişə dövründə dost və qonşu ölkə olan İran İslam Respublikasının Azərbaycanın ərazi bütövlüyünə verdiyi dəstəyin də məmnunluqla xatırlandığını bildirmiş və buna görə təşəkkürlərini çatdırmışdır.
Sonda Əli Əlizadə Azərbaycanın müstəqilliyi, suverenliyi və ərazi bütövlüyü uğrunda canlarından keçən bütün Şəhidlərimizin, zəfər səlnaməsinin unudulmaz qəhrəmanlarının əziz xatirəsini dərin hörmət və ehtiramla yad etmiş, onların Azərbaycan xalqı üçün ölmədiyini və qəhrəman kimi əbədi olaraq tarixə qovuşduqlarını vurğulamışdır.
Mərasimdə çıxış edən Türkiyənin İrandakı səfiri Dərya Örs 30 il ərzində Ermənistanın təcavüz və işğal siyasətinə məruz qalmış Azərbaycanın bu illər ərzində böyük açılar çəkdiyini və günahsız insanlarının qətlə yetirilməsi, şəhər və kəndlərinin dağıdılması, mədəni, tarixi, dini abidələrinin vanadlizmə, məhv edilməyə uğraması ilə qarşılaşdığını, lakin bütün bu haqsızlıqlara sinə gərərək ədaləti bərpa etdiyini bildrmişdir. Diplomat tarix boyu Türkiyə və Azərbaycanın bir birinin yayanında dayandığı və ulu öndər Heydər Əliyevin dediyi kimi İki dövlət bir millət nümunəsi sərgilədiyini diqqətə çatdırmışdır. Dərya Örs, Azərbaycanın Vətən müharibəsində həlak olan şəhidlərinin xatirəsinin Türkiyə üçün də əziz olduğunu bildirərək onların daim qəlblərdə yaşadığını və unudulmayacağını bildirmişdir.
Çıxışlardan sonra anım mərasimi bədii hissə ilə davam etdirilmiş, İranlı müsiqiçilər Fərid İsmayılzadənin tarda və Ehsan Şaminin isə skripkada ifası ilə şəhidlərimizin əziz xatirəsinə Xarı Bülbül, Şəhidlər Ölməz, Ay Laçın, Xudayar Təsnifi və digər Azərbaycan musiqiləri təqdim olunmuş, səfirliyin diplomatlarının övladları tərəfindən şəhidlərimizə həsr olunmuş şeirlər səsləndirilmişdir.
