https://innews.az/uploads/news/2022-09/_innews_16c995284326830556065746d_o.jpg
Azərbaycan Diasporuna Dəstək Fondunun Cənubi Koreya Respublikasının mühim elmi araşdırmalar mərkəzlərindən biri olan Beynəlxalq Dil və Ədəbiyyat Assosiasiyası ilə birgə əməkdaşlığı çərçivəsində yeni bir layihəyə imza atılmışdır. Belə ki, hər il minlərlə tələbə və elmi tədqiqatçının istifadəsinə verilən Beynəlxalq Dil və Ədəbiyyat dərgisinin 52-ci buraxılışında ilk 5 məqalə "Azərbaycan Ədəbiyyatında Qarabağ" mövzusuna həsr olunmuşdur. Məqalələr Azərbaycan, Koreya və ingilis olmaqla üç dildə təqdim edilmişdir.
Azərbaycan ədəbiyyatında Qarabağın önəmini koreyalı oxuculara çatdırmaq məqsədilə tanınmış ədəbiyyatşünas alimlər tərəfindən müxtəlif mövzular işlənmişdir.
Mövzunun Qarabağ ədəbiyyatı seçilməsi isə heç də təsadüfi deyil. Azərbaycan Respublikası Prezidenti cənab İlham Əliyevin Sərəncamı ilə 2022-ci il Azərbaycanda “Şuşa ili” elan olunmuşdur. Bu gün ölkəmizin mədəniyyət paytaxtı, tarixən isə Qarabağ xanlığının paytaxtı olmuş Şuşa şəhəri öz təbiətinin gözəlliyi ilə yanaşı, yetişdirdiyi şair, rəssam, memar və musiqiçilərlə ölkənin tarixi-mədəni irsinə öz töhfəsini vermişdir.
Azərbaycan ədəbiyyatının Koreyada tanınması və öyrənilməsi istiqamətində Fond tərəfindən atılan ilkin addım bu sahədəki əlaqələrin daha da inkişafına təkan verməklə yanaşı, Qarabağ həqiqətlərinin də dünya ictimaiyyətinə çatdırılmasında böyük əhəmiyyət daşıyır.
Layihənin ərsəyə gəlməsində göstərilən təşəbbüs və dəstəyə görə Koreya Beynəlxalq Dil və Ədəbiyyat Assosiasiyasının Prezidenti Kang Seok-geun və fəlsəfə doktoru, məqalələrin Koreya dilinə tərcüməçisi Leyla Məsimliyə təşəkkürümüzü bildiririk.
Ən son xəbərləri səhifəmizdən də izləyin
