https://innews.az/uploads/news/2022-10/_innews_fe79b76896265755b7ee3e39d_o.jpg
Meksikanın nüfuzlu “Contra Replica” qəzetində bu ölkədəki səfirimiz Məmməd Talıbovun “Ermənistan niyə sülh istəmir?” başlıqlı yazısı dərc olunub.
Məqalədə sentyabrın 12-si gecə saatlarında Ermənistanla Azərbaycan arasındakı şərti sərhəddə Ermənistan silahlı qüvvələri tərəfindən Daşkəsən, Kəlbəcər və Laçın istiqamətlərində törədilən genişmiqyaslı təxribat, Azərbaycan Ordusunun bölmələrinin mövqeləri arasındakı ərazilərin minalanması və Azərbaycan Ordusunun mövqelərinin intensiv atəşə tutulması barədə məlumat verilir.
Yazıda həmçinin, 79 nəfərin ölümü ilə nəticələnən təcavüzə cavab olaraq, təxribatların qarşısının alınması və yaxın ərazilərdə təhlükəsizliyin təmin edilməsi məqsədilə Azərbaycan Ordusu tərəfindən təxirəsalınmaz və müvafiq tədbirlərin görüldüyü qeyd olunur. Həmçinin, toqquşmalar zamanı Azərbaycanın beynəlxalq hüquqa sadiq ölkə kimi öz cavabını yalnız Ermənistanın hərbi obyektlərinə yönəltdiyi və Ermənistan tərəfinin də təsdiqlədiyi kimi, mülki əhalisi arasında tələfat və xəsarətin olmadığı bildirilir.
Məqalədə, Ermənistanın Azərbaycana qarşı bu son təxribatının Azərbaycanın 2020-ci ildə BMT Təhlükəsizlik Şurasının 4 qətnaməsinə uyğun olaraq öz ərazilərini qanunsuz erməni işğalından azad etdikdən sonra Ermənistanın törətdiyi siyasi və hərbi təxribatlar silsiləsinin daha bir həlqəsi olduğu bildirilir. Eyni zamanda, Azərbaycanın regionda sülhün bərqərar olunması üçün qonşu ölkəsi ilə münasibətləri normallaşdırmağa çalışdığı, lakin Ermənistanın öz mövqeyi və əsassız ərazi iddiaları ilə sülh danışıqlarına xələl gətirdiyi vurğulanır.
Məqalədə, hərbi təxribatların Azərbaycanın deyil, Ermənistanın maraqlarına xidmət etdiyi, Azərbaycan üçün hərbi qarşıdurmaların onun sərhədyanı ərazilərdə yenidənqurma layihələri və iri miqyaslı sərmayələri üçün bilavasitə təhlükə törətdiyi halda, Ermənistanın bundan Azərbaycanla sülh danışıqlarından yayınmaq üçün istifadə etdiyi qeyd olunur.
Həmçinin, son günlərdə erməni diasporunun ölkəmizin bir sıra səfirliklərini hədəf alaraq Azərbaycana qarşı təxribatlar həyata keçirdiyi bildirilir və bu aqressiv münasibətin Ermənistanın Azərbaycan və beynəlxalq vasitəçilərin sülh sazişi əldə etmək səylərinə mane olmağa çalışdığının göstəricisi olduğu qeyd olunur.
Yazıda həmçinin, Azərbaycanın işğaldan azad edilmiş ərazilərində apardığı minatəmizləmə işləri zamanı, 2021-ci il Ermənistan istehsalı olan piyada əleyhinə minaların aşkar edildiyi, Ermənistanın 2020-ci il ildə imzalanmış Üçtərəfli Bəyannamənin müddəalarına əməl etməyərək, öz silahlı qüvvələrini Azərbaycan ərazisindən çıxarmadığı və bu faktların Ermənistan tərəfindən beynəlxalq hüququn kobud şəkildə pozmaqda davam etdiyini açıq şəkildə göstərdiyi qeyd olunur.
