https://innews.az/uploads/news/2025-08/_innews_2198035e941638eafc1973f69_o.jpg
Azərbaycan Respublikası Mədəniyyət Nazirliyinin, Azərbaycan Respublikası Elm və Təhsil Nazirliyinin və Heydər Əliyev Mərkəzinin birgə təşkilatçılığı ilə keçirilən Uşaq İncəsənət Festivalı uğurla davam edir.
Festivalın məqsədi ümummilli lider Heydər Əliyevin mədəniyyətə və gənclərə göstərdiyi qayğını əsas tutaraq, milli mədəniyyətin və incəsənətin təbliği, uşaqların vətənpərvərlik, milli-mənəvi dəyərlərə hörmət ruhunda tərbiyə olunması, eləcə də onların yaradıcılıq qabiliyyətlərinin inkişaf etdirilməsinə dəstək göstərilməsidir.
Festivalın ikinci – regional seçim mərhələsi 22 avqust 2025-ci il tarixinədək davam edəcəkdir. Bu mərhələdə Qazax-Tovuz Regional Mədəniyyət İdarəsini əhatə edən Qazax, Ağstafa, Tovuz, Şəmkir və Gədəbəy rayonlarından olan şagirdlər iştirak edirlər.
Birinci turda fərqlənərək növbəti mərhələyə vəsiqə qazanan iştirakçıların sayı 602 nəfər təşkil edir. Onlardan 593-ü fərdi, 9-u isə kollektiv çıxış nümayiş etdirəcək. Kollektiv iştirakçılar arasında 6 xor kollektivi və 3 milli rəqs ansamblı yer alır.
Tovuz rayon Nizami adına Mədəniyyət evində keçirilən festivalın ikinci mərhələsində uşaqlar müxtəlif nominasiyalar üzrə öz istedadlarını nümayiş etdirir, həm fərdi bacarıqları, həm də kollektiv çıxışları münsiflər heyəti tərəfindən qiymətləndirilir.
Qeyd edək ki, ikinci mərhələdə uğur qazanan iştirakçılar respublika üzrə keçiriləcək final mərhələsində iştirak hüququ qazanacaqlar.
Festival, uşaqlarda milli mədəniyyətə sevgi, vətənpərvərlik ruhu və yaradıcılıq bacarıqlarının inkişaf etdirilməsinə xidmət edir.
Ən son xəbərləri səhifəmizdən də izləyin
