https://innews.az/uploads/news/2022-10/_innews_62d7d21dc0f785e782be92c23_o.jpg
6 oktyabr tarixində Zaqatala rayonunda, Yaponiya hökumətinin “Ot Kökləri və İnsan Təhlükəsizliyi Qrant Yardımı Proqramı” çərçivəsində icra olunmuş “Zaqatala rayonunun Aşağı Tala kəndində 3 nömrəli uşaq bağçasının inşası” layihəsinin təqdimat mərasimi həyata keçirildi. Mərasimdə Yaponiyanın Azərbaycan Respublikasındakı Fövqəladə və Səlahiyyətli Səfiri Vada Cüniçi, Zaqatala Rayon İcra Hakimiyyətinin Başçısı Mübariz Əhmədzadə və“Azərbaycan İcma inkişafı üzrə araşdırmalar, təlim və resurs mərkəzi” İctimai Birliyi nümayəndələri iştirak etmişdir.
Bu layihədə əsas məqsəd, 1939-cu ildə inşa edilmiş və 2012-ci il Zaqatala rayonunda baş vermiş zəlzələ nəticəsində istifadəyə yararsız hala düşmüş 3 nömrəli uşaq bağçasının sökülərək, öncəki tikilinin mövcud olduğu yerdə yeni uşaq bağçasının inşa edilməsi nətəcəsində kənd sakini olan uşaqların məktəbəqədər təhsil şəraitinin yaxşılaşdırılmasıdır. Bu layihənin icra olunması üçün Yaponiya hökuməti 150,549 manat (89,082 ABŞ dolları) məbləğində qrant ayırmışdır.
İndiyə qədər Azərbaycan Respublikasında ”Ot Kökləri və İnsan Təhlükəsizliyi Qrant Yardımı Proqramı” çərçivəsində icra olunmuş layihələrin ümumi sayı 278 olmaqla, ümumi qrant məbləği isə 39,865,000 AZN-i (23,450,000 ABŞ dolları) keçmişdir.
“Ot kökləri və İnsan Təhlükəsizliyi Qrant yardımı Proqramı” Azərbaycan Respulikasının əhalisinin sosial rifahının yaxşılaşdırılması məqsədi ilə səhiyyə, ictimai sağlamlıq, təhsil və kənd təsərrüfatı sahələrində bilavasitə yerli əhalinin bəhrələnəcəyi nisbətən kiçik miqyaslı layihələrin həyata keçirilməsi üçün nəzərdə tutulan iqtisadi yardım proqramıdır. Bu yardımla bağlı yerli bələdiyyə və icra hakimiyyəti orqanları, qeyri-hökumət təşkilatları, təhsil, səhiyyə orqanları və digər qeyri-kommersiya qurumlarının müraciəti mümkündür. Yeni layihə ilə bağlı Yaponiyanın Azərbaycan Respublikasındakı səfirliyinə müraciət edə bilərsiniz.
