https://innews.az/uploads/news/2025-10/_innews_c2c70db1027c832afb7ec332a_o.jpg
Azərbaycan Dövlət Pedaqoji Universitetində 27 Sentyabr - Anım Gününə həsr olunmuş silsilə tədbirlər çərçivəsində “Anım və qürur günü” adlı tədbir təşkil olunub. Tədbir Azərbaycan Gənclər Fondunun dəstəyi, Azərbaycan Tələbə Gənclər Təşkilatları İttifaqı və “Böyük Qayıdış” Gənclər Təşkilatının birgə təşkilatçılığı ilə keçirilib.
Tədbirdə ADPU-nun sosial və humanitar məsələlər üzrə prorektoru Fikrət Rzayev, “Böyük Qayıdış” Gənclər Təşkilatının sədri Nail Şükürov, Azərbaycan Tələbə Gənclər Təşkilatları İttifaqının baş katibi Fidan Həsənova, universitetin şəhid məzunu Tural Dəmirçiyevin atası Rəfail Dəmirçiyev, təşkilatın İdarə Heyətinin üzvü, Aprel döyüşlərinin qazisi Əhliyət Mehdiyev, həmçinin Vətən müharibəsinin qəhrəman qaziləri Elşad Təhməzov və Rahil Xəlilov və tələbələr iştirak ediblər.
Tədbirdə çıxış edən ADPU-nun sosial və humanitar məsələlər üzrə prorektoru professor Fikrət Rzayev nitqində Vətən müharibəsində qazanılan tarixi Zəfərin dövlətçilik tarixində mühüm yer tutduğunu, gənclərin milli-mənəvi dəyərlərə sədaqət ruhunda tərbiyəsinin prioritet istiqamətlərdən biri olduğunu vurğulayıb. Prorektor universitetdə vətənpərvərlik mövzusunda aparılan tədbirlərin davamlı xarakter daşıdığını qeyd edib və bu cür silsilə tədbirlərin gənclərdə vətənpərvərlik hisslərinin formalaşması baxımından vacibliyini diqqətə çatdırıb.
Tədbir çərçivəsində çıxışçılar 44 günlük Vətən müharibəsinin Azərbaycanın tarixində tutduğu yer, azad edilmiş torpaqların bərpası və Böyük Qayıdış prosesi, qələbənin yaratdığı yeni reallıqlar barədə söz açıb, qəhrəmanlar döyüş xatirələrini tələbələrlə bölüşüblər.
Tədbir tələbələrin sualları ətrafında müzakirələrlə davam edib.
Ən son xəbərləri səhifəmizdən də izləyin
