https://innews.az/uploads/news/2025-12/_innews_ff0c943249333486d92de9461_o.jpg
Dekabrın 23-də Azərbaycan Dövlət Pedaqoji Universitetində (ADPU) Elmi Şuranın növbəti iclası keçirilib.
İclasda açılış nitqi ilə çıxış edən ADPU-nun rektoru professor Cəfər Cəfərov universitetdə son dövrdə görülmüş işlərə toxunaraq tədris və elmi fəaliyyətin keyfiyyətinin yüksəldilməsinin, şəffaflıq və məsuliyyət prinsiplərinin qorunmasının əsas prioritetlərdən olduğunu vurğulayıb. Rektor qarşıdan gələn imtahan sessiyasının yüksək təşkilati səviyyədə keçirilməsinin vacibliyini qeyd edib. Sonra rektor Türk dünyasının mədəniyyət və incəsənətinə verdiyi töhfələrə görə filologiya elmləri doktoru, professor Elman Quliyevə TÜRKSOY medalını təqdim edib. Eləcə də elmi dərəcə almış əməkdaşlardan Şəfa Muradovaya fəlsəfə doktoru diplomu, Pedaqogika üzrə fəlsəfə doktoru Nigar İsmayılova və Filologiya üzrə fəlsəfə doktoru Esmira Ağamirzəyevaya dosent elmi adını təsdiq edən attestatlar təqdim edilib.
Elmi Şuranın gündəliyinə uyğun olaraq Tədris departamentinin direktoru dosent Sənan Əliyev “ADPU-nun 2025/2026-cı tədris ilinin payız semestrinin imtahan sessiyasına hazırlığının vəziyyəti” mövzusunda məruzə ilə çıxış edib. Məruzədə bildirilib ki, imtahan sessiyasının təşkili ilə bağlı bütün əsas hazırlıq və təşkilati məsələlər yekunlaşdırılıb, müvafiq əmr layihəsi hazırlanıb. Qeyd olunub ki, imtahanların 05 yanvar – 05 fevral 2026-cı il tarixlərində, fənn kreditinin 25 faizini ödəmək şərti ilə təkrar imtahanların isə 06–11 fevral tarixlərində keçirilməsi nəzərdə tutulur. İmtahanların əsasən ADPU-nun əsas və II tədris binalarında, xüsusi qabiliyyət tələb edən fənlər üzrə isə III tədris binasında gündə üç növbədə təşkil ediləcəyi diqqətə çatdırılıb. Ümumilikdə Bakı şəhəri üzrə 11 500-dən artıq bakalavr və magistrantın imtahanlarda iştirakı planlaşdırılır.
İclasda həmçinin ADPU ilə Həmkarlar İttifaqı Komitəsi arasında imzalanmış müqavilə müzakirə olunub. Məsələ ilə bağlı Həmkarlar İttifaqı Komitəsinin sədri dosent Vaqif Əliyev çıxış edərək sənədin universitet əməkdaşlarının sosial rifahının yaxşılaşdırılması baxımından əhəmiyyətini vurğulayıb.
Daha sonra cari məsələlər müzakirə edilib. Elm və innovasiyalar üzrə prorektor professor Asəf Zamanov fəlsəfə doktoru və magistrlik dissertasiya mövzularının, elmi rəhbərlərin təsdiqi, magistrlik dissertasiyalarının yazılması qaydaları, fənn olimpiadalarının və musiqi-incəsənət müsabiqəsinin keçirilməsi, “İlin gənc alimi və tədqiqatçısı” nominasiyası üzrə müsabiqənin təşkili barədə təkliflərlə çıxış edib.
Maliyyə komissiyasının təklifləri isə rektorun müşaviri Ümid Mehdiyev tərəfindən Şura üzvlərinin diqqətinə çatdırılıb.
Yekunda təqdim olunan təkliflər Elmi Şura tərəfindən səsə qoyularaq qəbul edilib.
