https://innews.az/uploads/news/2026-01/_innews_5e0eff17e02ac22819127ae4b_o.jpg
Goranboy rayonu Quşçular kənd tam orta məktəbində “Mən gələcəyin robototexnikiyəm” adlı qrant layihəsinin icrasına başlanılıb. Layihənin əsas məqsədi məktəbin 8–12 yaşlı şagirdlərini robot texnologiyaları ilə tanış etmək, bu sahəyə maraqlarını artırmaq və robototexnika üzrə ilkin bilik və bacarıqların formalaşdırılmasını təmin etməkdir.
Layihə çərçivəsində şagirdlərə robot texnologiyalarının əsas prinsipləri onların yaş səviyyəsinə və maraq dairəsinə uyğun şəkildə izah olunur. Onlara robotların fərdiləşdirilməsi, hərəkət və dil proqramlarının yüklənməsi, eləcə də sadə robot modelləri üzərində praktiki fəaliyyətlərin həyata keçirilməsi yolları öyrədilir. Şagirdlər bu prosesdə öz ideyalarını reallaşdırmaq imkanı əldə edirlər.
Layihə proqramına uyğun olaraq Bakıda yerləşən “Suraxanı Gəmi Muzeyi”ndə fəaliyyət göstərən “Azerobot”un robot texnologiyalarına həsr olunmuş sərgi-muzey bölməsinə ekskursiyaların təşkili də nəzərdə tutulub. Bu ekskursiyalar şagirdlərin real robot modelləri ilə yaxından tanış olmasına və praktiki biliklərini genişləndirməsinə şərait yaradacaq.
Qeyd edək ki, layihə Təhsildə inkişaf və innovasiyalar üzrə IX qrant müsabiqəsinin qalibi olub. Layihə Goranboy rayonu Quşçular kənd Hakim Cəfərov adına tam orta məktəbin coğrafiya müəllimi Aytən Məmmədova tərəfindən icra olunur.
