Riyaziyyatın dəqiqliyi ilə yoğrulmuş fədakar ömür - Kamran Məmmədovun 65 illik şərəfli pedaqoji yolu

Riyaziyyatın dəqiqliyi ilə yoğrulmuş fədakar ömür - Kamran Məmmədovun 65 illik şərəfli pedaqoji yolu Riyaziyyatın dəqiqliyi ilə yoğrulmuş fədakar ömür - Kamran Məmmədovun 65 illik şərəfli pedaqoji yolu https://innews.az/az/news/id-57216

Bu gün Azərbaycan təhsilinin dəyərli simalarından biri, riyaziyyat müəllimi Kamran Məmmədovun 65 illik yubileyi qeyd olunur. Ömrünü elmin və gənc nəslin təlim-tərbiyəsinə həsr edən Kamran müəllim uzun illərdir ki, yüksək peşəkarlığı və fədakarlığı ilə seçilir.

Kamran Məmmədov gənclik illərindən etibarən elmə olan dərin marağı ilə fərqlənib. O, Azərbaycan Dövlət Pedaqoji Universitetinin Riyaziyyat fakültəsini fərqlənmə diplomu ilə bitirərək, qazandığı bilikləri gələcək nəsillərə ötürməyi özünə həyat missiyası seçib.

Onun pedaqoji fəaliyyəti 1982-ci ildə Qəbələ rayonunun Xırxatala kənd orta məktəbində başlayıb. Gənc yaşlarından idarəçilik bacarığı ilə seçilən Kamran müəllim 1986–1991-ci illərdə həmin məktəbdə dərs hissə müdiri, 1999–2001-ci illərdə isə direktor vəzifəsində çalışaraq kənd təhsilinin inkişafına mühüm töhfələr verib. 2002-ci ildən etibarən isə fəaliyyətini Bakı şəhəri Nəsimi rayonu 240 nömrəli tam orta məktəbdə davam etdirir.

Kamran Məmmədovun pedaqoji fəaliyyətinin əsas göstəricisi onun yetirmələrinin qazandığı uğurlardır. Onun tədris metodikası nəticəsində şagirdləri hər il qəbul imtahanlarında 600-dən yuxarı bal toplayaraq ali məktəblərə qəbul olunurlar. Bu gün Kamran müəllimin şagirdləri təkcə Azərbaycanda deyil, dünyanın müxtəlif ölkələrində həkim, mühəndis, eləcə də müasir dövrün ən aktual sahələrindən biri olan kiber təhlükəsizlik üzrə mütəxəssis kimi fəaliyyət göstərirlər.

Fədakar müəllimin əməyi dövlət və təhsil ictimaiyyəti tərəfindən də yüksək qiymətləndirilib. Şagirdlərinin buraxılış imtahanlarında göstərdiyi yüksək nəticələrə, təlim-tərbiyə prosesindəki fərqlənməsinə və Respublika Fənn Olimpiadalarında qazanılan uğurlara görə Kamran Məmmədov Bakı Şəhəri üzrə Təhsil İdarəsi tərəfindən dəfələrlə Fəxri Fərmanlarla təltif olunub.

Kamran müəllim həm də xeyirxah, prinsipial və mehriban insan, nümunəvi ailə başçısı kimi tanınır. Üç övlad və üç nəvə sahibi olan ziyalı müəllim ailə dəyərlərinə xüsusi önəm verir.

Onun illərdir şagirdlərinə aşıladığı həyat fəlsəfəsi isə belədir: “Çalışın imkanlarınızla arzularınız üst-üstə düşsün.” Bu prinsip Kamran Məmmədovun öz həyat yolunun da əsas düsturuna çevrilib.

65 illik yubileyi münasibətilə Kamran Məmmədovu ürəkdən təbrik edir, ona möhkəm cansağlığı və pedaqoji fəaliyyətində yeni uğurlar arzulayırıq.
Müdrik yaşınız mübarək, dəyərli müəllim!