https://innews.az/uploads/news/2026-02/_innews_1b7dcd58e500e3ad78a7d3506_o.jpg
Avropa İttifaqının (Aİ) Azərbaycandakı Nümayəndəliyi Avropa İttifaqına üzv dövlətlərin səfirlikləri ilə birgə altıncı “FantazEU” Mədəni İrs Festivalı çərçivəsində “Avropa Meydanları” adlı foto sərgisini təşkil edəcək.
Avstriya, Belçika, Bolqarıstan, Xorvatiya, Çexiya, Fransa, Almaniya, Macarıstan, Latviya, Litva, Niderland, Polşa, Rumıniya, Slovakiya və İsveç səfirlikləri uzun müddətdir ki, mədəniyyət həyatı, tarixi və sosial mübadilə mərkəzləri kimi xidmət edən Avropanın məşhur və daha az tanınan meydanlarını əks etdirən fotoşəkillər təqdim ediblər.
“Bu, incəsənət, memarlıq və mədəni dialoqu bir araya gətirən unikal bir sərgidir. Sərgi fotoqrafiya vasitəsilə Avropanın şəhər irsinin zənginliyini və müxtəlifliyini vurğulayır. Sərgi, xüsusilə də, Azərbaycanın 2026-cı ildə qeyd etdiyi “Şəhərsalma və Memarlıq İli” ilə üst-üstə düşdüyü üçün aktualdır. Bütün Azərbaycan sakinlərini sərgini ziyarət etməyə və qitə boyunca vizual səyahət təklif edən möhtəşəm tarixi meydançaları vasitəsilə Avropanı kəşf etməyə dəvət edirik”, - deyə Avropa İttidaqı səfiri xanım Marijana Kujundzic bildirib.
“Avropa Meydanları” fotosərgisi 10 fevraldan etibarən Neftçilər prospekti, 66 ünvanında yerləşən Crescent Mall Ticarət Mərkəzinin birinci mərtəbəsində ictimaiyyət üçün açıq olacaq.
FantazEU Mədəni İrs Festivalının proqramına həmçinin milli geyim və ornamentlər sərgisinin təşkili, canlı yaradıcı vorkşoplar, Aİ ölkələrindən onlayn şəhər turları daxildir. Bütün yenilənmiş məlumatlar Aİ-nin Azərbaycandakı Nümayəndəliyinin Facebook səhifəsindən əldə edilə bilər https://www.facebook.com/EUDelegationtoAzerbaijan/.
Arts Council Azərbaycan təşkilatı, Avropa İttifaqının Azərbaycandakı Nümayəndəliyi tərəfindən maliyyələşdirilən müqavilə çərçivəsində təşkilati dəstək göstərir.
