https://innews.az/uploads/news/2022-10/_innews_93c8ba65e9b9466b4b2005fcc_o.jpg
“İnformasiya və kommunikasiya texnologiyalarının tətbiqi” ("AICT2022") mövzusunda Vaşinqtonda keçirilən 16-cı beynəlxalq konfrans başa çatıb.
ADA Universiteti (Azərbaycan), Corc Vaşinqton Universiteti (ABŞ) və Turin Politexnik Universiteti (İtaliya) tərəfindən birgə təşkil edilən "AICT2022" konfransı ADA Universitetinin Vaşinqton Mərkəzinin təşkilatı dəstəyi və Elektrik və Elektronika Mühəndisləri İnstitutunun sponsorluğu ilə həyata keçirilib.
Üç gün davam edən konfrans hibrid formatda baş tutub. Tədbirin ilk günü ABŞ-ın Corc Vaşinqton Universitetində, sonuncu günü isə ADA Universitetinin Vaşinqton Mərkəzində təşkil olunub.
Konfransda ADA Universiteti, Corc Vaşinqton Universiteti və Turin Politexnik Universitetinin dekanları salamlama nitqi ilə çıxış ediblər. ADA Universitetinin İnformasiya Texnologiyaları və Mühəndislik fakültəsinin dekanı Səncər Yeralan konfrans iştirakçıları üçün təqdimat edib. "AICT2022" konfransında universitetlər və tədqiqat mərkəzləri də daxil olmaqla 40-dan çox qurumun nümayəndəsi iştirak edib və müxtəlif mövzularda təqdimatlar ediblər.
Səkkiz sessiyadan ibarət konfrans "Data analitikası və Qabaqcıl Analitika", "Yüksək performanslı hesablama, maşın öyrənməsi və digər süni intellekt texnikaları", "Siqnalların emalı, İKT tətbiqində müasir nailiyyətlər", "Kommunikasiya, şəbəkə və avadanlıq", "Biznes, idarəetmə, iqtisadiyyat, elm, təhsil, sosial və humanitar tədqiqatlar, tibb və səhiyyədə İKT" kimi mövzuları əhatə edib.
