Pedaqoji Universitetdə tələbələrin müvəffəqiyyət göstəricisi 88%-dən artıqdır

Martın 2-də Azərbaycan Dövlət Pedaqoji Universitetində (ADPU) Elmi Şuranın növbəti iclası keçirilib.

İclası giriş sözü ilə açan ADPU-nun rektoru professor Cəfər Cəfərov ötən dövrdə universitetdə həyata keçirilən tədbirlər, tədris və elmi fəaliyyət sahəsində əldə olunan nəticələr barədə ətraflı məlumat verib. Rektor ötən Elmi Şuradan sonra elmi ad və dərəcələr almış əməkdaşlara müvafiq təsdiqedici sənədləri təqdim edib. T.e.d. Sevinc Məmməd qızı Seyidovaya professor attestatı, B.ü.f.d. Bəsti Qoşun qızı Əsədovaya, r.ü.f.d. Sevinc Zaid qızı Xalıqovaya və p.ü.f.d. Nigar Ramiz qızı İsmayılovaya dosent attestatları təqdim edilib. P.e.d. Şiruyə Məhəmmədəli qızı Azadəliyevaya elmlər doktoru diplomu, T.ü.f.d. Mürvət Cavid oğlu Əliyevə (Quba filialı) fəlsəfə doktoru diplomu verilib. Rektor Kimya və biologiya fakültəsinin Naxçıvan Muxtar Respublikasının Ekologiya və Təbii Sərvətlər Nazirliyində “Plastik Reinkarnasiyası: İkinci Həyat” mövzusunda seminar keçmiş IV tədris ili tələbələri Fatimə Abdullayeva və Gülay İmanzadəni təşəkkürnamə ilə təltif edib.

Tədris departamentinin direktoru dosent Sənan Əliyev payız semestrinin imtahan sessiyasının yekunlarına dair hesabat məruzəsi ilə çıxış edərək bildirib ki, payız semestrində bakalavriat səviyyəsi üzrə 10405, magistratura səviyyəsi üzrə 972 olmaqla ümumilikdə 11377 nəfər tələbə imtahanlarda iştirak edib. Sessiya çərçivəsində təhsilin hər iki səviyyəsi üzrə ümumilikdə 3510 imtahan təşkil edilib. Üzürlü səbəbdən 231 nəfər tələbə üçün əlavə imtahan keçirilib. Fənni dinləmədən, 25 faiz ödəniş etməklə yenidən imtahan verənlərin sayı isə 2478 nəfər olub. Ümumilikdə sessiya müddətində təqribən 70 minə yaxın imtahan nəticəsi qeydə alınıb. İmtahan sessiyasının nəticələrinə əsasən iş sayına görə müvəffəqiyyət göstəricisi 88 faiz, keyfiyyət göstəricisi isə 37 faiz təşkil edib. Ötən tədris ili ilə müqayisədə hər iki göstəricidə artım müşahidə olunub. Bakalavriat səviyyəsində müvəffəqiyyət göstəricisi 81 faizdən sabit qalmaqla, keyfiyyət göstəricisi 39 faizdən 41 faizə yüksəlib. Magistratura səviyyəsində isə müvəffəqiyyət göstəricisi 97 faizdən 99 faizə, keyfiyyət göstəricisi 73 faizdən 75 faizə yüksəlib. Sessiya ərzində İmtahan Qərargahına ümumilikdə 115 müraciət daxil olub. Bu müraciətlərdən 52-si tələbələrin xeyrinə həll edilib, 41 müraciət təsdiqini tapmayıb, 22 nəfər isə müraciətini geri götürüb. Apellyasiya Komissiyasına isə 2160 ərizə daxil olub. Bu müraciətlərin 640-ı (29,6 faiz) müsbət həll edilib, 1013 halda (46,8 faiz) tələbənin qiyməti qüvvədə saxlanılıb, 507 müraciətə isə imtina verilib.

Daha sonra iclas cari məsələlərin müzakirəsi ilə davam edib. Strateji inkişaf məsələləri üzrə prorektor Könül Pirverdiyeva ADPU-nun Strateji İnkişaf Planına dəyişikliklərin edilməsi barədə təkliflərini səsləndirib. Tədris işləri üzrə prorektor dosent Eldar Aslanov tədris prosesi və imtahan sisteminin təkmilləşdirilməsi üçün nəzərdə tutulan təklifləri təqdim edib. Elm və innovasiyalar üzrə prorektor professor Asəf Zamanov “Pedaqoji Universitetin Xəbərləri: Riyaziyyat və Təbiət elmləri” seriyası jurnalının redaksiya heyətində xarici ölkələrin nüfuzlu alimlərinin fəaliyyətinə icazə verilməsi, magisrt dissertasiya işlərinin müdafiəsi üçün təşkil edilmiş İxtisaslaşmış Şura üzvlərinin əməyinin ödənilməsi və yaradıcılıq məzuniyyətinə icazə verilmə barədə təkliflər verib. Tədris departamentinin direktoru dosent Sənan Əliyev ADPU-nun 2025/2026-cı tədris ilinin payız semestrinin imtahan sessiyasının nəticələrinə əsasən adlı təqaüd alan namizədlərin təsdiqi və dərs vəsaitlərinin nəşrinə icazə verilməsi barədə, Rektorun müşaviri Ümid Mehdiyev ADPU strukturunda dəyişikliyin edilməsi və Maliyyə Komissiyasının təklifləri barədə çıxış edib.

Sonda təkliflər səsə qoyularaq qəbul edilib.