ADPU “Fibonacci Beynəlxalq Robot Olimpiadası"nda uğurla təmsil olunub

7-8 mart 2026-cı il tarixində Azərbaycanda “Fibonacci Beynəlxalq Robot Olimpiadası” keçirilib.

Olimpiadada dünyanın bir sıra aparıcı universitetlərinin professorları qonaq qismində iştirak edərək gənclərin layihələrini qiymətləndiriblər və texnologiya sahəsində yeni trendlər haqqında fikirlərini bölüşüblər. Olimpiada çərçivəsində özəl və dövlət məktəblərinin, həmçinin universitetlərin şagird və tələbələri müxtəlif robot kateqoriyaları üzrə yarışaraq öz mühəndislik və proqramlaşdırma bacarıqlarını nümayiş etdiriblər. 21 fərqli kateqoriya üzrə keçirilən yarışlarda Azərbaycanın 37 fərqli təhsil müəssisəsindən 1000-dək şagird və tələbə iştirak edib. Olimpiadanın beynəlxalq miqyasda əhəmiyyətini artıran məqam isə Qazaxıstan və Türkiyədən olan komandaların da yarışa qatılmasıdır.

Yarışmada Azərbaycan Dövlət Pedaqoji Universitetinin tələbələri universiteti uğurla təmsil ediblər.

Riyaziyyat fakültəsinin Kompüter elmləri kafedrasının müəllimi Xumarə Nəsirlinin mentorluğu ilə fakültənin tələbələri Günay Cəfərova, Pərvin Cəfərova, Elvin Əzizli və fakültənin məzunu Türkanə Qəhrəmanlıdan ibarət komanda 5 kateqoriya üzrə mübarizə aparıblar. “FireteKh” komandası RoboTech Entrepreneurship kateqoriyası üzrə I yerə, “FishteKh” komandası BlueTech Entrepreneurship kateqoriyası üzrə I yerə , “Smart Girls” komandası Girls Triathlon kateqoriyası üzrə II yerə, “RoadteKh” komandası Autonomous Car kateqoriyası üzrə II yerə, “ScanteKh” komandası SoftTech Entrepreneurship kateqoriyası üzrə II yerə layiq görülüblər.

Fizika fakültəsinin nəzdində fəaliyyət göstərən STEAM mərkəzinin müəllimləri Vəfa Abdurəhmanova, Natella Namazova və Çinarə Məmmədovanın mentorluğu ilə yarışmaya qatılan Fizika fakültəsinin tələbələri Elton Kazımov, Ramal Məmmədəliyev, Əli Mahmudov, Esmira Abdullayeva, Aydın Mövludzadə və Riyaziyyat fakültəsinin tələbələri Gülayə Mustafazadə, Rəvanə Məmmədova,Xəyalə Əhmədova, Rəvanə Mövsümova, Fidan Əliyeva, Səkinə Novruzzadədən ibarət RoboAz_ADPU, FasterX_ADPU, Dinoco_ADPU, LuneX_ADPU və M_Double_ADPU komandaları müxtəlif kateqoriyalar üzrə yarışlarda uğurlu nəticə göstəriblər. Yarışın nəticələrinə əsasən, “Xətt izləyən robotlar” kateqoriyasında FasterX_ADPU komandası ikinci, M_Double_ADPU komandası üçüncü yerə layiq görülüb. “Xətt izləyən robot – mbot” kateqoriyasında RoboAz_ADPU komandası üçüncü yeri tutub. “Mini sumo” kateqoriyasında isə Dinoco_ADPU və LuneX_ADPU komandaları münsiflər heyətinin xüsusi mükafatı ilə təltif olunublar.

ADPU-nun rektoru professor Cəfər Cəfərov olimpiadada uğurla iştirak etmiş tələbələri qəbul edib. Görüş zamanı rektor tələbələrin beynəlxalq yarışda qazandıqları nailiyyətləri yüksək qiymətləndirib, onların robot texnologiyaları və mühəndislik sahəsində əldə etdikləri nəticələrin universitet üçün əhəmiyyətli olduğu vurğulanıb. Rektor tələbələri təbrik edərək onlara gələcək fəaliyyətlərində uğurlar arzulayıb.