https://innews.az/uploads/news/2026-04/_innews_4a32c3e9074f962c6b1619bf5_o.jpg
Aprelin 14-də Azərbaycan Respublikasının elm və təhsil nazirinin müavini İdris İsayev Quba şəhərinə səfəri çərçivəsində Azərbaycan Dövlət Pedaqoji Universitetinin (ADPU) Quba filialının pedaqoji heyəti ilə görüşüb. Səfərin əsas məqsədi regionlarda təhsil müəssisələrinin fəaliyyətinin yaxından izlənilməsi, tədris prosesinin keyfiyyətinin qiymətləndirilməsi və pedaqoji kadr hazırlığının mövcud vəziyyətinin müzakirəsi olub.
Səfər çərçivəsində nazir müavini, əvvəlcə filialın maddi-texniki bazası ilə tanış olub. Filialın direktoru professor Yusif Alıyev nazir müavini İdris İsayevə Azərbaycan-Özbəkistan Türk dünyası Tanıtım və Kültür Mərkəzi, tələbələr üçün yaradılmış sosial və təhsil mühiti, kitabxana fondu, elektron resurslara çıxış imkanları barədə ətraflı məlumat verilib. Nazir müavini müəllim və tələbələrlə səmimi söhbət apararaq onların təklif və fikirlərini dinləyib, təhsil prosesinin daha da təkmilləşdirilməsi ilə bağlı müvafiq tövsiyələrini verib.
Daha sonra pedaqoji heyətlə geniş tərkibdə görüş keçirilib. Görüşdə Quba RİH başçısı İlqar Mahmudov, filialın rəhbərliyi və professor-müəllim heyəti iştirak edib.
Nazir müavini İdris İsayev çıxışında regionlarda ali təhsilin inkişafının dövlət siyasətinin prioritet istiqamətlərindən biri olduğunu qeyd edib. Vurğulanıb ki, pedaqoji kadrların keyfiyyətli hazırlanması ölkənin gələcək inkişafı üçün mühüm əhəmiyyət daşıyır. Nazir müavini diqqətə çatdırıb ki, Prezident İlham Əliyevin rəhbərliyi dövründə təhsil sahəsi dövlət siyasətinin ən strateji prioritetlərindən birinə çevrilmişdir. Bu diqqət və qayğı təkcə infrastrukturun yenilənməsində deyil, həm də təhsilin keyfiyyətinin yüksəldilməsi və insan kapitalının inkişafında özünü aydın şəkildə büruzə verir.
Quba Rayon İcra Hakimiyyətinin başçısı İlqar Mahmudov çıxışında regionda ali təhsil müəssisələrinin fəaliyyətinin yerli inkişaf baxımından əhəmiyyətini qeyd edib. O, ali təhsil müəssisələri ilə yerli icra strukturları arasında əməkdaşlığın vacibliyini vurğulayıb, gənclərin ixtisaslı kadr kimi hazırlanmasının regionun sosial-iqtisadi inkişafı ilə əlaqəli olduğunu bildirib.
Daha sonra çıxış edən filialın direktoru prof. Yusif Alıyev Quba filialının fəaliyyəti, inkişaf mərhələləri və mövcud göstəriciləri barədə təqdimat edib. Bildirilib ki, filial 35 illik fəaliyyəti dövründə müxtəlif inkişaf mərhələlərindən keçib, tədris, infrastruktur və elmi fəaliyyət istiqamətlərində işlər aparılıb.
Görüş qarşılıqlı fikir mübadiləsi şəraitində davam edib, müəllim və tələbələri maraqlandıran suallar cavablandırılıb, təkliflər dinlənilib.
