https://innews.az/uploads/news/2026-04/_innews_9de86c7013f4d92c17f914dd7_o.jpg
Resource HUB tərəfindən icra olunan layihə çərçivəsində Neftçala və Lənkərandan olan gənc qızlar öz innovativ ekoloji layihələrini təqdim ediblər.
Bakıda "Resource HUB" tərəfindən həyata keçirilən “Eko Səfir Qızlar” proqramının yekun təqdimat mərasimi baş tutub. Tədbirdə Lənkəran və Neftçala rayonlarını təmsil edən gənc fəallar proqram çərçivəsində hazırladıqları “toxum layihələri”ni ictimaiyyətə nümayiş etdirərək, ekologiya və icma inkişafı sahəsindəki fəaliyyətləri barədə məlumat veriblər.
9 bölgəni əhatə edən geniş coğrafiya
Mərasimdə çıxış edən natiqlər proqramın gənc qızların liderlik bacarıqlarının inkişafına və ekoloji biliklərinin artırılmasına verdiyi töhfəni yüksək qiymətləndiriblər. Layihə rəhbəri və ideya müəllifi Fidan Dərgahlı bildirib ki, “Eko Səfir Qızlar” indiyədək ölkənin 7 fərqli bölgəsində (Quba, Qusar, Bərdə, Mingəçevir, Ağdam, Qəbələ və İsmayıllı) uğurla icra edilib. Builki mərhələdə isə cənub bölgəsinin gəncləri — Lənkəran və Neftçala iştirakçıları prosesə cəlb olunublar.
Ekologiyadan sosial təşəbbüslərə qədər
Tədbirdə vurğulanıb ki, layihənin əsas xətti ekologiya olsa da, onun təsir dairəsi daha genişdir. İştirakçılar aşağıdakı istiqamətlərdə maraqlı təşəbbüslərlə çıxış ediblər:
Resursların qorunması: “Bir Ağac – Bir Məsuliyyət”, “Təmiz Su – Sağlam Gələcək”;
İcma inkişafı: “Şəhərimizi tanıyaq”, “Eko Klub”;
Yaşıl iqtisadiyyat: “Fermerdən Şəhərə: Yaşıl Bazar”, “Sağlam Həyat, Sağlam Qida”;
Sosial məsuliyyət: “Səssiz Dostların Səsi” (Heyvanların mühafizəsi) və “Gənclər danışır: Eko Media”.
Strateji hədəflər və qlobal çağırışlar
Mərasimdə qlobal iqlim dəyişikliyi və təbii resursların tükənməsi kimi çağırışların aktuallığı qeyd olunub. Xüsusilə, Azərbaycanın 2026-cı ili “Şəhərsalma və Memarlıq İli” elan etməsi və Bakının Dünya Şəhər Forumuna ev sahibliyi edəcəyi bir vaxtda gənclərin bu cür layihələrdə iştirakının milli prioritetlərə xidmət etdiyi bildirilib.
Tədbirin sonunda proqram iştirakçılarına sertifikatlar və tərəfdaş Yelo Bank tərəfindən xüsusi hədiyyələr təqdim olunub.
