https://innews.az/uploads/news/2026-05/_innews_b9f2416f840dc00642383cf54_o.jpg
AZCON Holding şirkətlərindən olan Azərkosmosun nəzdində fəaliyyət göstərən KOSMİK Akademiyanın təşkilatçılığı, ABŞ-nin “Blue Origin” şirkəti, “Club for Future” təşkilatı, Məktəbəqədər və Ümumi Təhsil üzrə Dövlət Agentliyi və “Azərpoçt” MMC-nin tərəfdaşlığı ilə həyata keçirilən “Məktəblilərarası Milli Kosmik Poçt Kartı Müsabiqəsi” layihəsinə start verilib.
Bu təşəbbüsün əsas məqsədi Azərbaycan məktəblilərinin kosmos və STEAM (elm, texnologiya, mühəndislik, incəsənət və riyaziyyat) sahələrinə olan marağını artırmaq, kosmik missiyalar haqqında biliklərini genişləndirmək və ölkənin müxtəlif bölgələrindən olan məktəblilərin bu sahədə inkişafını dəstəkləməkdir. Layihə Azərbaycanın bütün regionlarını, o cümlədən ucqar kənd məktəblərini əhatə edəcək və kosmik maarifləndirmə sahəsində ölkənin beynəlxalq səviyyədə mövqeyini gücləndirəcək.
Layihədə ölkə üzrə 2000 məktəbdən 200 min nəfərədək şagirdin iştirakı nəzərdə tutulur. Məktəblər öz daxili müsabiqələrini keçirərək ən yaxşı poçt kartlarını seçəcək və həmin kartlar KOSMİK Akademiyaya təqdim ediləcək. Layihənin sonunda seçilmiş 2000 ədəd poçt kartı raket missiyası ilə kosmosa göndəriləcək və geri qayıtdıqdan sonra “Kosmosa uçmuşdur” təsdiq möhürü ilə iştirakçılara təqdim ediləcək. Bu təşəbbüs çərçivəsində məktəblilər yaratdıqları poçt kartları ilə kosmosa mesaj göndərmək imkanı qazanacaqlar.
Layihə ümumilikdə məktəblilərin beynəlxalq kosmik təcrübəyə qoşulmasına və onların yaradıcılığının beynəlxalq səviyyədə nümayiş etdirilməsinə, kosmik təhsilin təşviqinə və ölkəmizin kosmos sahəsində mövqeyini gücləndirməyə xidmət edəcək.
Qeyd edək ki, “Kosmosa poçt kartları” (Postcards to Space) “Blue Origin” şirkəti tərəfindən təsis edilmiş “Club for the Future” təşkilatı tərəfindən həyata keçirilən beynəlxalq təhsil təşəbbüsüdür. Bu beynəlxalq proqram dünyanın 100-dən çox ölkəsini əhatə edir. İndiyədək 100 mindən çox poçt kartı “Blue Origin” şirkətinin “New Shepard” missiyası ilə kosmosa göndərilib və geri qaytarılıb. “Məktəblilərarası Milli Kosmik Poçt Kartı Müsabiqəsi” Azərkosmosun “Blue Origin” şirkəti ilə əməkdaşlığı və beynəlxalq “Kosmosa poçt kartları” layihəsi çərçivəsində həyata keçirilir.
