https://innews.az/uploads/news/2026-05/_innews_c509e635b346683b31eaaa3aa_o.jpg
Bu gün biz Su İdmanı Sarayı-nın bədii gimnastika üzrə baş məşqçisi, milli və beynəlxalq dərəcəli məşqçi və hakim, peşəkar fəaliyyəti ilə Azərbaycan və beynəlxalq yarışların qaliblərini yetişdirən Nəzirəxanım Fəradova ilə birlikdəyik. O, 2014-cü ildən etibarən məşqçi kimi fəaliyyət göstərir və bu müddət ərzində yüzlərlə gimnastın inkişaf yoluna dəstək olub.
- Bu sahəyə yeni başlayan valideynlər və gimnastlar çox vaxt böyük gözləntilərlə gəlirlər. Sizcə, yolun əvvəlində nələri düzgün anlamaq və nələrə hazır olmaq vacibdir?
- İlk növbədə qeyd etmək istərdim ki, hər bir uşaq fərdidir və hər gimnast fərqli inkişaf yolu keçir. Əgər söhbət peşəkar gimnastikadan gedirsə, bu yolun böyük səbir, zəhmət, həm fiziki, həm də psixoloji güc tələb etdiyini anlamaq vacibdir. Burada ailənin, məşqçinin dəstəyi və ən əsası uşağın öz istəyi mühüm rol oynayır.
Uşaqlar adətən gimnastikaya böyük həvəslə başlayırlar. Yarışlarda gördükləri çıxışlar onlara asan görünə bilər, amma ilk çətinliklər zamanı motivasiya azala bilir. Bu məqamda məşqçi və valideynin düzgün yanaşması çox önəmlidir.
Ən vacibi uşağı başqaları ilə müqayisə etmək deyil, onun bu gününü dünəni ilə müqayisə etməkdir. Məncə, valideyn uşağın yanında dayanan, onu anlayan və motivasiya edən bir dayağa çevrilməlidir. Eyni zamanda, heç bir uğur uşağın özgüvəninin zədələnməsi bahasına olmamalıdır.
- Bu sahədə öz sözünü demiş peşəkar məşqçi olaraq, fəaliyyətiniz boyunca sadiq qaldığınız əsas prinsiplər hansılardır? Məşqçi kimi sizin üçün dəyişməz öncəliklər nədir?
- Məşqçi fəaliyyətimin əvvəlində düşünürdüm ki, yaxşı nəticə üçün disiplin və ciddi nəzarət kifayətdir. Lakin illər ərzində anladım ki, ən vacib məqam uşağa düzgün yanaşmaq və ona motivasiya verməkdir.
Mənim üçün əsas prinsip uşağın ən çətin anında onun yanında olmaq, özünə inanmadığı vaxtda ona psixoloji və mənəvi dəstək göstərməkdir. Həmçinin hər gimnasta fərdi yanaşmanın vacibliyinə inanıram. Çünki bütün uşaqlar eyni formada öyrənmir və eyni nəticəni eyni zamanda göstərmir.
Məncə, məşq zalında uşağın özünü rahat və güvəndə hiss etməsi çox vacibdir. Gimnast bilməlidir ki, səhv etmək normaldır və hər zaman dəstək ala bilər.
- Gimnastların həm fiziki, həm də psixoloji hazırlığı üçün hansı metodlardan istifadə olunur?
- Fiziki hazırlıq zamanı gimnastların gücləndirilməsi üçün müəyyən məşq rejiminə sadiq qalırıq. Xüsusilə yarışdan əvvəlki iki-üç həftədə məşqlər daha intensiv olur və gündə iki dəfə keçirilir. Bu müddətdə düzgün qidalanma və kifayət qədər istirahətə də xüsusi diqqət yetirilir.
Psixoloji hazırlıqda isə əsas məqsəd gimnastları yarış atmosferinə uyğunlaşdırmaqdır. Bunun üçün yarışlardan əvvəl kontrol məşqləri təşkil edirik. Həmin gün valideynlər və yaxınlar zala dəvət olunur ki, uşaqlar tamaşaçı qarşısında çıxış etməyə alışsınlar. Bu üsul onların özünəinamını artırır, stress və həyəcanı azaltmağa kömək edir.
- Qarşıdakı dövr üçün hansı planlar və hədəfləriniz var?
- Qarşıda bizi həm milli, həm də beynəlxalq yarışlar, Azərbaycan birinciliyi və çempionatları gözləyir. Əsas məqsədimiz klubumuzu və ölkəmizi bu yarışlarda layiqincə təmsil etməkdir.
Bununla yanaşı, sağlam, istedadlı, bacarıqlı və psixoloji cəhətdən güclü gimnastlar yetişdirmək əsas hədəflərimizdəndir. İstəyirik ki, onların potensialını düzgün inkişaf etdirək və gələcəkdə milli komandaya seçilmələrinə dəstək olaq. Ən böyük arzumuz isə onların Azərbaycan bayrağını Avropa və dünya arenalarında qürurla təmsil etməsidir.
