https://innews.az/uploads/news/2026-05/_innews_10854e39bcec18b124ece2093_o.jpg
Azərbaycan Dövlət Pedaqoji Universitetinin (ADPU) Quba filialında beynəlxalq elmi-pedaqoji əlaqələrin inkişafı istiqamətində əhəmiyyətli addımlar atılır.
Özbəkistan Respublikasının nüfuzlu ali təhsil müəssisələrindən olan Urgənc Dövlət Universitetinin professor-müəllim heyətindən ibarət nümayəndələri 27 aprel-6 may 2026-cı il tarixlərində filialda akademik səfərdə olublar. Səfərin əsas məqsədi müasir ali təhsil mühitində qarşılıqlı təcrübə mübadiləsinin aparılması, tədris prosesinin keyfiyyətinin yüksəldilməsi, innovativ pedaqoji yanaşmaların tətbiqi istiqamətində fikir mübadiləsinin genişləndirilməsi, həmçinin gələcək elmi-tədqiqat və akademik əməkdaşlıq perspektivlərinin müəyyənləşdirilməsidir.
Səfər çərçivəsində universiteti təmsil edən alimləri - Cəbr və riyazi mühəndislik kafedrasının dosenti İroda Baltayeva, Riyazi analiz kafedrasının dosenti Moxira Vaisova və Kompüter elmləri və süni intellekt texnologiyaları kafedrasının dosenti Muxabbat Raximbayeva qəbul edən ADPU-nun Quba filialının direktoru professor Yusif Alıyev Azərbaycan və Özbəkistan arasındakı dostluq və tərəfdaşlıq münasibətlərinin tarixi köklərinə toxunaraq, bu əlaqələrin ali təhsil müstəvisində daha da möhkəmləndirilməsinin əhəmiyyətini xüsusi vurğulayıb. Prof. Y.Alıyev, eyni zamanda, iki ali təhsil müəssisəsi arasında formalaşan qarşılıqlı etimada əsaslanan müsbət akademik mühitin gələcək birgə layihələr üçün geniş imkanlar açdığını qeyd edib.
Səfər müddətində keçirilən işgüzar görüşlərdə tədris və elmi fəaliyyət sahəsində təcrübə mübadiləsi həyata keçirilib, birgə elmi-tədqiqatların təşkili, müəllim və tələbə mübadiləsi proqramlarının genişləndirilməsi kimi mühüm məsələlər ətrafında fikir mübadiləsi aparılıb.
Filialda beynəlxalq əlaqələrinin inkişafına istiqamətlənən digər əhəmiyyətli hadisə isə Qazaxıstan Respublikasının İbray Altynsarin adına Arkalık Pedaqoji Universitetinin nümayəndə heyətinin elmi-pedaqoji səfəri olub.
Nümayəndə heyətində dosent Aygül Kasabolat, dosent Meyrgül Ospanbekova, magistrant Saniya Jumabayeva və bir neçə müəılim yer alıb. Səfər çərçivəsində qonaqlar tərəfindən məlumat xarakterli seminar təşkil edilib, təqdimatlar zamanı müasir pedaqoji yanaşmalar, innovativ tədris metodları və beynəlxalq təcrübə ilə bağlı ətraflı məlumat verilib.
Proqram çərçivəsində qonaqlar filialda müxtəlif ixtisaslar üzrə keçirilən dərslərdə iştirak edib, tədris prosesini yerində müşahidə edərək ali təhsil mühitinin təşkili ilə yaxından tanış olublar. Bununla yanaşı, “Təhsildə trendlər” mövzusunda keçirilən təlimlərdə çağdaş təhsil modelləri, rəqəmsallaşma və tələbəyönümlü yanaşmalar geniş müzakirə olunub.
Səfərin davamında nümayəndə heyəti filialın Özbəkistan-Azərbaycan Türk Dünyası Tanıtım və Kültür Mərkəzində pedaqoji kollektivlə görüş keçirib. Görüşdə tərəflər arasında elmi-pedaqoji sahədə əməkdaşlıq, akademik mübadilə və birgə layihələrin həyata keçirilməsi perspektivləri ətrafında fikir mübadiləsi aparılıb.
Ən son xəbərləri səhifəmizdən də izləyin
