https://innews.az/uploads/news/
Azərbaycanın paytaxtı Bakı bu günlərdə şəhərsalma və dayanıqlı urban inkişaf sahəsində dünyanın ən nüfuzlu beynəlxalq platformalarından biri olan BMT-nin Ümumdünya Şəhərsalma Forumunun 13-cü sessiyasına (WUF13) ev sahibliyi edir.
Bakı Olimpiya Stadionunda keçirilən mötəbər tədbirə dünyanın 180-dən artıq ölkəsindən nümayəndələr, dövlət rəsmiləri, beynəlxalq təşkilatların təmsilçiləri, şəhərsalma üzrə ekspertlər və müxtəlif sahələr üzrə mütəxəssislər qatılıblar.
BMT-nin Məskunlaşma Proqramı (UN-Habitat) və Azərbaycan Hökumətinin birgə təşkilatçılığı ilə keçirilən forum mayın 17-də işə başlayıb və mayın 22-dək davam edəcək. WUF13 bu il “Hər kəs üçün yaşayış yerləri: təhlükəsiz və dayanıqlı şəhərlər və yaşayış məskənləri” mövzusuna həsr olunub.
Beş gün davam edəcək forum çərçivəsində şəhərlərin gələcək inkişafı, urban idarəetmə, dayanıqlı infrastruktur, sosial inklüzivlik, iqlim çağırışları və müasir şəhərsalma həlləri ilə bağlı çoxsaylı panel sessiyalar, müzakirələr, təqdimatlar və ikitərəfli görüşlər təşkil olunur.
Qlobal urban gündəliyin formalaşdırılmasında mühüm rol oynayan WUF13 çərçivəsində şəhərlərin daha təhlükəsiz, dayanıqlı və insanyönümlü inkişafı ilə bağlı çağdaş yanaşmalar müzakirə edilir, müxtəlif ölkələrin təcrübələri bölüşülür.
Forumun keçirildiyi Bakı Olimpiya Stadionunda yaradılan xüsusi ekspozisiya zonaları, iştirakçı ölkələrin pavilyonları və təqdimat məkanları tədbirə xüsusi dinamika qatır.
Ən son xəbərləri səhifəmizdən də izləyin
