AzMİ nümayəndə heyəti Türkiyəyə işgüzar səfər edib

Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyinin tabeliyində olan Azərbaycan Metrologiya İnstitutunun (AzMİ) nümayəndə heyəti Türkiyə Respublikasına işgüzar səfər edib.

Səfərin əsas məqsədi Türkiyə Elmi və Texnoloji Tədqiqat Şurasının Milli Metrologiya İnstitutunun (TÜBİTAK UME) dəstəyi ilə AzMİ-də yaradılması planlaşdırılan yeni etalon laboratoriyalarına dair texniki məsələlərin müzakirəsi, təlimlərin təşkili, həmçinin avadanlıqlarla bağlı logistika və gömrük məsələlərinin əlaqələndirilməsi olub.

Görüş zamanı yeni laboratoriyaların beynəlxalq tutuşdurmalara qoşulması, kalibrlənmə və ölçmə imkanları üzrə CMC (Calibration and Measurement Capabilities) sətirlərinin hazırlanması barədə fikir mübadiləsi aparılıb. Layihə çərçivəsində AzMİ-də yaradılması nəzərdə tutulan üzvi kimya, qeyri-üzvi kimya, qaz sərfiyyatı, su sərfiyyatı, qaz metrologiyası, kalorifik dəyərlərin ölçülməsi, akustika, gərginlik və cərəyan, güc və enerji, fırlanma momentinin ölçülməsi, kütlə, təzyiq, temperatur və nəmlik, kontakt termometriyası və yüksək gərginlik ölçmələri laboratoriyalarının TÜBİTAK UME-də fəaliyyət göstərən analoji laboratoriyalarına yerində baxış keçirilib.

Sonda nümayəndə heyəti TÜBİTAK UME-də fəaliyyət göstərən Kvant metrologiyası və Kibbl tərəzisi laboratoriyaları ilə tanış olub, burada tətbiq olunan texnologiyalar və ölçmə metodları barədə məlumat əldə edib.