ADPU III Türk Dünyası Gənc Tədqiqatçılarının Beynəlxalq Konqresinə ev sahibliyi edir

Türk Əməkdaşlıq və Koordinasiya Agentliyinin (TİKA), Türkiyə Maarif Vəqfi, Yunus Əmrə İnstitutu və Azərbaycandakı Türkiyə Məzunu Ziyalıları və İş Adamları Platformasının dəstəyi, Xəzər Universiteti və Azərbaycan Dövlət Pedaqoji Universitetinin tərəfdaşlığı ilə 10-13 may tarixlərində keçirilən III Türk Dünyası Gənc Tədqiqatçılarının Beynəlxalq Konqresi davam edir.

6 ölkədən 30 universitetin tərəfdaşlığı və Azərbaycan, Türkiyə, Qazaxıstan, Özbəkistan və Qırğızıstan da daxil olmaqla 22 ölkədən 156 universitet və qurumu təmsil edən 400-dək alim iştirak etdiyi konqresin onlayn bölmələri 10-12 may tarixlərində təşkil olunub.

Mayın 12-də Xəzər Universitetində rəsmi açılış mərasimi keçirilən beynəlxalq konqresin əyani bölmə iclasları isə mayın 13-də gün ərzində ADPU-da keçirilir.
Bölmə iclaslarında dil və ədəbiyyat, kommunikasiya, təhsil, mədəniyyət və incəsənət, iqtisadiyyat, sosiologiya, fəlsəfə, psixologiya, hüquq, siyasi elmlər və beynəlxalq münasibətlər, ilahiyyat, idman, təbiət və riyaziyyat elmləri, tarix, mühəndislik və səhiyyə kimi bir çox sahələr üzrə məruzələr dinlənilərək, elmi müzakirələr aparılır.