https://innews.az/uploads/news/2022-11/_innews_7d0ae234c6094c4ec11ada1f6_o.jpg
Dövlət himnlərinin səsləndirilməsi ilə başlanan rəsmi qəbulda Azərbaycanın şanlı qələbəsini və işğaldan azad edilən ərazilərdə yenidənqurma və bərpa işlərini əks etdirən videoçarxlar nümayiş etdirilmişdir.
Tədbirdə çıxış edən Azərbaycanın İrandakı səfiri Əli Əlizadə uzun zaman Ermənistanın təcavüz və işğalından əziyyət çəkmiş ölkəmizin Qələbə Gününün qeyd olunmasının çox sevincli və əlamətdar olduğunu bildirmişdir. Səfir, 30 il ərzində Azərbaycanın məruz qalmış olduğu təcavüzün acı həqiqətlərini dünya ictimaiyyətinə çatdırdığını, məsələnin BMT-nin qətnamələri və beynəlxalq hüququn prinsipləri əsasında daim həllinə çalışdığını, lakin qətnamələrin icrasını təmin etmək üçün Ermənistana qarşı heç bir beynəlxalq sanksiya tətbiq edilmədiyini və Ermənistanın Azərbaycana qarşı hərbi təcavüzünə son qoymağa məcbur etmək üçün dünya ictiaiyyəti tərəfindən qətiyyətli addımlar atılmadığını bildirmişdir. Ermənistanın özünün də münaqişənin həlli istiqamətində hər hansı bir müsbət addım atmaqda belə maraqlı olmadığını və yekunda təxribat xarakterli addımları və bəyanatları ilə danışıqlara son qoyduğunu bildirən səfir, Ermənistanın 2020-ci ilin sentyabr ayında Azərbaycana qarşı başlatdığı irimiqyaslı hərbi hücumun müharibəni qaçılmaz etdiyini diqqətə çatdırmışdır.
Müzəffər Ali Baş Komandanın qətiyyətli və müdrik rəhbərliyi, xalqımızın möhkəm birliyi, şəhidlərimizin əzmkarlığı və fədakarlığı, hərbçilərimizin peşəkarlığı və qəhrəmanlığı ilə Ermənistanın təslim aktına imza atmağa məcbur edildiyini bildirən səfir, Azərbaycanın şanlı qələbəsinin ədalətin və beynəlxalq hüququn zəfəri olduğunu, 30 il sürən uzunmüddətli işğala, təcavüzə və ədalətsizliyə son qoyulduğunu vurğulamışdır. 2022-ci il, Azərbaycan Respublikası Prezidentinin sərəncamı ilə ölkəmizdə Şuşa ili elan edildiyini bildirən səfir Əli Əlizadə Azərbaycanın şanlı Vətən müharibəsinin Şuşada başa çatdığını və torpaqların azad edilməsinin tarixi nailiyyət olduğunu qeyd etmişdir.
Səfir Azərbaycanın münasibətlərin normallaşdırılması və sülh sazişinin imzalanması ilə bağlı apardığı səylərindən, Azərbaycanın Qarabağ və Şərqi Zəngəzur regionunda həyata keçirdiyi genişmiqyaslı abadlıq və yenidənqurma işlərindən, yatırılan investisiyalardan da söhbət açmış, qəhrəmanlıqları əbədi olaraq xatırlanacaq şəhidlərimizin əziz xatirəsini dərin hörmət və ehtiramla yad edərək, tarixi Qələbə Günü münasibətilə həmvətənlərimizi təbrik etmişdir.
Daha sonra Azərbaycan Silahlı Qüvvələrinin İrandakı hərbi attaşesi, polkovnik Elvin Qasımov Azərbaycan Respublikasının Prezidenti, Silahlı Qüvvələrin Müzəffər Ali Baş Komandanının rəhbərliyi ilə 44 günlük Vətən müharibəsi və rəşadətli Azərbaycan Silahlı Qüvvələrinin göstərdiyi qəhrəmanlıq, xüsusilə Şuşa əməliyyatı haqqında iştirakçılara məlumat vermişdir.
Hərbi attaşe həmçinin, Azərbaycan-İran dövlət sərhəddinin 132 km lik hissənin də işğaldan azad olunmasının 2-ci ilinin tamam olduğunu bildirmiş və Azərbaycan Respublikası Prezidentinin bu münasibətlə təbrik mesajını xatırlatmış, bu hadisənin ölkələrimiz arasında xüsusi önəmini qeyd etmişdir.
Vurğunlamışdır ki, Azərbaycan Silahlı Qüvvələrinin qələbəsinin yaratdığı yeni reallıqlar regionda davamlı sülhün təmin olunmasına xidmət edir. Azərbaycan Silahlı Qüvvələri zəngin döyüş təcrübəsi, yüksək səviyyəli idarəetmə, yeni xüsusi təyinatlı hissələr, həmçinin müasir silah sistemləri ilə regionda özünün yaratdığı sülhün, sabitliyin keşiyində durmağa daim hazırdır.
Rəsmi qəbul, ziyafət və Azərbaycana aid müxtəlif videoçarxların nümayişi, musiqilərin səsləndirilməsi ilə davam etmişdir. Qonaqlar həmçinin, Azərbaycanın Vətən müharibəsinə və Zəfər Gününə dair təşkil olunmuş foto sərgi ilə də tanış olmuşlar.
Tədbirdə İran Silahlı Qüvvələrinin yüksək rütbəli zabitləri, dövlət qurumlarının rəsmi şəxsləri, kütləvi informasiya vasitələrinin və ictimaiyyətin nümayəndələri, İqtisadi Əməkdaşlıq Təşkilatının Baş katibi və müavinləri, xarici ölkələrin İrandakı səfirləri, hərbi attaşeləri və diplomatları, ziyalılar, sənət adamları, Tehranda yaşayan azərbaycanlılar iştirak etmişlər.
