https://innews.az/uploads/news/2026-06/_innews_20906be63795901bc6a071f06_o.jpg
30–31 may tarixlərində Bakı şəhərində yerləşən Aydanı Art Gallery da rəssam və dizayner Aygün İlyasovanın və tələbələrinin yaradıcılıq sərgisi keçirilib.
Sərgidə 11 tələbə ümumilikdə 40-a yaxın rəsm əsəri ilə iştirak edib. Bununla yanaşı, sərginin təşkilatçısı və müəllifi Aygün İlyasovanın da 4 müəllif əsəri nümayiş olunub. Müəllim və tələbələrin əsərlərinin eyni məkanda təqdim edilməsi sərgiyə xüsusi məna qataraq yaradıcılıq əlaqəsinin və sənətdə varisliyin gözəl nümunəsini ortaya qoyub.
Ekspozisiyada təbiət mənzərələri, portretlər, dekorativ kompozisiyalar, milli-mənəvi mövzular və müasir incəsənət nümunələri yer alıb. Müxtəlif yaş qruplarını təmsil edən iştirakçıların əsərləri ziyarətçilər tərəfindən maraqla qarşılanıb və yüksək qiymətləndirilib.
Mayın 30-da baş tutan rəsmi açılış mərasimində incəsənət nümayəndələri, media təmsilçiləri, sənətsevərlər, iştirakçıların ailə üzvləri və çoxsaylı qonaqlar iştirak ediblər. Tədbirin fəxri qonaqları sırasında Azərbaycan Dövlət Mədəniyyət və İncəsənət Universitetinin Təsviri sənət tarixi və nəzəriyyəsi kafedrasının müdiri, sənətşünaslıq üzrə fəlsəfə doktoru, dosent Aslan Xəlilov da yer alıb.
Açılış zamanı çıxış edən Aslan Xəlilov gənc rəssamların yaradıcılıq fəaliyyətinin dəstəklənməsinin vacibliyini vurğulayaraq sərgidə nümayiş olunan əsərləri yüksək qiymətləndirib. O, belə layihələrin gələcək rəssamların formalaşmasında mühüm rol oynadığını qeyd edib.
Tədbirdə çıxış edən rəssam Aygün İlyasova tələbələrinin yaradıcılıq inkişafından bəhs edərək bildirib ki, sərginin əsas məqsədi onların istedadlarını geniş auditoriyaya təqdim etmək, sənətə olan maraqlarını daha da artırmaq və yaradıcılıq yolunda onlara motivasiya verməkdir.
Sərgi çərçivəsində iştirakçılar öz əsərlərini təqdim etmək, tamaşaçılarla ünsiyyət qurmaq və sənət haqqında fikir mübadiləsi aparmaq imkanı əldə ediblər. Tədbirin sonunda iştirakçılara sertifikatlar təqdim olunub.
Layihənin həyata keçirilməsində İlyasova Art Studio, Aydanı Art Gallery, Inovation Art and Travel Center və media tərəfdaşları dəstək göstəriblər.
İki gün davam edən sərgi ərzində yüzlərlə sənətsevər ekspozisiyanı ziyarət edib. İştirakçıların uğurlu çıxışı və tamaşaçıların marağı bir daha göstərib ki, gənc nəslin incəsənətə olan sevgisi və yaradıcılıq potensialı böyükdür.
“Rənglər, düşüncələr və ilham…” devizi altında keçirilən sərgi sənətin insanları birləşdirən gücünü bir daha nümayiş etdirərək iştirakçılar və qonaqlar üçün yaddaqalan bir mədəniyyət hadisəsinə çevrilib.
Ən son xəbərləri səhifəmizdən də izləyin
