Azərbaycan və Avropa İttifaqı şəhərsalma sahəsində əməkdaşlığı genişləndirir

Dövlət Şəhərsalma və Arxitektura Komitəsinin sədri Anar Quliyev Avropa İttifaqının Azərbaycan Respublikasındakı Nümayəndəliyinin rəhbəri Mariyana Kuyundziç ilə görüşüb.

Görüşdə şəhərsalma və memarlıq, yaşıl transformasiya, şəhər mühitinin keyfiyyətinin yüksəldilməsi və qarşılıqlı maraq doğuran digər məsələlər ətrafında fikir mübadiləsi aparılıb.

Anar Quliyev Azərbaycan ilə Avropa İttifaqı arasında həyata keçirilən birgə layihələrin müasir şəhərsalma prinsiplərinin tətbiqinə, qabaqcıl beynəlxalq təcrübənin öyrənilməsinə və innovativ həllərin təşviqinə mühüm töhfə verdiyini bildirib. O, bu əməkdaşlığın ölkədə dayanıqlı inkişaf məqsədlərinin həyata keçirilməsi, yaşıl və rəqəmsal transformasiyanın dəstəklənməsi, eləcə də müasir şəhər idarəçiliyi yanaşmalarının tətbiqi baxımından əhəmiyyətini vurğulayıb.

Görüşdə Avropa İttifaqının ağıllı və sağlam şəhərlərin inkişafı, həmçinin şəhər infrastrukturunun müasirləşdirilməsi istiqamətində dəstək göstərdiyi təşəbbüslər nəzərdən keçirilib. Tərəflər şəhərsalma, şəhər mobilliyi və innovativ həllərin tətbiqi sahələrində əməkdaşlığın davam etdirilməsində maraqlı olduqlarını bildiriblər.