İyun ayında Bakı metrosundan 18 milyondan çox sərnişin istifadə edib

İyun ayında Bakı metrosu ilə 18 milyondan çox sərnişin daşınıb.

"innews Media" xəbər verir ki, bu göstərici ötən ilin eyni ayı ilə müqayisədə 6,9 faiz çoxdur.

Məlumata görə, iyun ayının ən çox sərnişin qəbul edən stansiyası 1 milyon 711 min 203 sərnişinlə "Koroğlu" stansiyası olub.

Ay ərzində ən yüksək sərnişin axını isə 1 iyun tarixində qeydə alınıb. Həmin gün metrodan 752 min 703 sərnişin istifadə edib.

Rəqəmsal ödənişlərdən istifadə də artmaqda davam edib. Belə ki, NFC və QR bilet vasitəsilə ümumilikdə 9 milyon 366 min 674 ödəniş həyata keçirilib ki, bu da ay ərzində metrodan ödənişli istifadə edən sərnişinlərin 51,9 faizini təşkil edib.

Bundan əlavə, "Əlçatan metro" xidməti çərçivəsində 161 sifariş icra olunub. Bu göstərici ötən ilin müvafiq dövrü ilə müqayisədə xidmətdən istifadə edən sərnişinlərin sayının 75 faiz artdığını göstərir.