https://innews.az/uploads/news/2026-07/_innews_c410bf648a173a4243a12c2be_o.jpg
Azərbaycan ölkə idman tarixində yeni bir səhifə açıb. The National Azerbaijan Golf Club-da keçirilən Caspian Junior Cup 2026 ölkə tarixində ilk beynəlxalq yeniyetmələr arasında qolf turniri olaraq Qazaxıstan, Özbəkistan və Qırğızıstan milli federasiyalarının ən güclü gənc qolfçularını bir araya gətirib.
Turnirdə iştirak edən gənc idmançıların bir çoxu gələcəkdə öz ölkələrini ən nüfuzlu beynəlxalq yarışlarda, o cümlədən Olimpiya Oyunlarının qolf yarışlarında təmsil edəcək perspektivli idmançılar hesab olunur.
Layihənin təşkilatçıları Quba Palace Hotel və The National Azerbaijan Golf Club olub. Turnir Azərbaycanda keçirilən on günlük Beynəlxalq Yeniyetmələr üçün Qolf Təlim Düşərgəsinin yekun tədbiri kimi təşkil edilib. On gün ərzində gənc idmançılar birlikdə məşq edib, təcrübə mübadiləsi aparıb, iştirakçı ölkələrin milli federasiyalarının baş məşqçilərinin rəhbərliyi altında oyun bacarıqlarını təkmilləşdirib, həmçinin komandalar arasında dostluq münasibətlərini daha da möhkəmləndiriblər.
Tədbirin əhəmiyyətini rəsmi qonaqların iştirakı daha da artırıb. Qaliblərin mükafatlandırma mərasimində iştirakçı ölkələrin səfirləri də daxil olmaqla diplomatik korpusun nümayəndələri iştirak edərək mükafatları şəxsən gənc idmançılara təqdim ediblər. Tədbirdə həmçinin millət vəkilləri, dövlət qurumlarının nümayəndələri, kütləvi informasiya vasitələrinin təmsilçiləri, tanınmış bloqerlər və influenserlər də iştirak ediblər.
Caspian Junior Cup turnirinin əsas məqsədi uşaq və yeniyetmə qolfunun inkişafına dəstək vermək, beynəlxalq idman əməkdaşlığını gücləndirmək və Azərbaycanı beynəlxalq qolfun yeni mərkəzlərindən biri kimi tanıtmaqdır. Layihə idman, dostluq və ortaq dəyərlər vasitəsilə ölkələri bir araya gətirərək, ünsiyyət, təcrübə mübadiləsi və yeni nəsil idmançıların yetişdirilməsi üçün uzunmüddətli platforma formalaşdırmağı hədəfləyir.
Caspian Junior Cup turnirinin keçirilməsi Azərbaycanda qolf idman növünün inkişafı istiqamətində mühüm addım olmaqla yanaşı, regionun müxtəlif ölkələrindən olan gənc idmançıları bir araya gətirəcək yeni illik beynəlxalq ənənənin əsasını qoyub.
Ən son xəbərləri səhifəmizdən də izləyin
