https://innews.az/uploads/news/2026-08/_innews_3618949e84ee7cb7fbeba8de3_o.jpg
Birləşmiş Ərəb Əmirlikləri (BƏƏ) Hörmüz boğazından keçərkən ADNOC-a bağlı daşıyıcı gəmini hədəfə alan raket hücumunu həyata keçirməsinə görə İrana qarşı sərt qınaq və etirazını bildirib. Hücum nəticəsində xəsarət alanların olmadığı bildirilir.
BƏƏ Xarici İşlər Nazirliyi (XİN) bəyanatında vurğulayıb ki, bu hücum BMT Təhlükəsizlik Şurasının naviqasiya azadlığının əhəmiyyətini təsdiq edən, kommersiya gəmilərinin hədəfə alınmasını və beynəlxalq dəniz marşrutlarının qarşısının alınmasını rədd edən 2817 saylı qətnaməsinin açıq şəkildə pozulmasıdır. Nazirlik qeyd edib ki, kommersiya gəmiçiliyinin hədəfə alınması və Hörmüz boğazından iqtisadi məcburetmə və ya şantaj vasitəsi kimi istifadə edilməsi İran İslam İnqilabı Keşikçiləri Korpusunun piratlıq əməlləridir və regionun sabitliyi, onun xalqları, eləcə də qlobal enerji təhlükəsizliyi üçün birbaşa təhdid təşkil edir.
BƏƏ, həmçinin, İranın bu səbəbsiz hücumlara son qoymasının, bütün hərbi əməliyyatların dərhal dayandırılması ilə bağlı öhdəliyinə tam əməl etməsinin və regional təhlükəsizliyin təmin edilməsi, qlobal iqtisadiyyat və ticarətin sabitliyinin qorunması məqsədilə Hörmüz boğazını tam və qeyd-şərtsiz açmasının zəruriliyini vurğulayıb.
Ən son xəbərləri səhifəmizdən də izləyin
