https://innews.az/uploads/news/2026-08/_innews_f57fabdc39394a05b7ce0dc47_o.jpg
Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin dəstəyi ilə həyata keçirilən "Koxlear implantlı uşaqların həyata adaptasiyası və valideynlərin maarifləndirilməsi" layihəsi uğurla başa çatdı.
Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə "Koxlear implantlı uşaqların həyata adaptasiyası və valideynlərin maarifləndirilməsi" layihəsi 11 avqust 2026-cı il tarixində uğurla yekunlaşdı.
İki ay davam edən layihə "Koxlear İmplantlı Şəxslərə Sosial Yardım" İctimai Birliyi tərəfindən həyata keçirilmiş, layihəyə Birliyin sədri Mehriban Hüseynova rəhbərlik etmişdir.
Layihənin əsas məqsədi koxlear implantlı uşaqların cəmiyyətə uğurlu inteqrasiyasına və həyata adaptasiyasına dəstək göstərmək, valideynlərin maarifləndirilməsini gücləndirmək, koxlear implant sahəsində çalışan mütəxəssislərlə ailələr arasında əməkdaşlığı, təcrübə və bilik mübadiləsini inkişaf etdirmək olmuşdur.
Layihə çərçivəsində hər biri 100 nəfərin iştirakı ilə iki genişmiqyaslı maarifləndirici tədbir təşkil edilmişdir.
Tədbir Azərbaycan Respublikasının Dövlət Himninin koxlear implantlı uşaqların ifasında səsləndirilməsi ilə açılmışdır. Bu duyğulu və qürurverici məqam iştirakçılar tərəfindən böyük alqışlarla qarşılanmış, tədbirə xüsusi təntənə və mənəvi dəyər qatmışdır.
Tədbirdə dövlət qurumlarının nümayəndələri, millət vəkilləri, Aydın Mirzəzadə Milli Məclisin Regional məsələlər Komitəsinin üzvü,
Ceyhun Məmmədov Milli Məclisin Elm və təhsil Komitəsinin üzvü,
Azər Allahverənov Milli Məclisin İnsan hüquqları komitəsinin üzvü.
Tanınmış həkimlər, LOR-cərrahlar, audioloqlar, surdoloqlar, loqopedlər, defektoloqlar, psixoloqlar, koxlear implant istifadəçiləri, valideynlər və digər aidiyyəti şəxslər iştirak etmişlər.
Tədbir zamanı iştirakçılar koxlear implant əməliyyatına aparan bütün mərhələlər barədə ətraflı məlumatlandırılmışlar. Dövlət dəstəyi ilə əməliyyatın həyata keçirilməsi qaydaları, eşitmə dərəcəsinin qiymətləndirilməsi, koxlear implant namizədlərinin seçilməsi meyarları, əməliyyat prosesi, əməliyyatdan sonrakı reabilitasiya, nitqin inkişafı, cihazdan düzgün istifadə, sosial adaptasiya və ailənin bu prosesdə rolu sahənin aparıcı mütəxəssisləri tərəfindən təqdimatlar və praktiki tövsiyələr əsasında geniş izah edilmişdir.
Tədbir çərçivəsində "Koxlear İmplantlı Şəxslərə Sosial Yardım" İctimai Birliyi təşkilatın fəaliyyət istiqamətləri və ölkədə koxlear implant sahəsi üzrə statistik göstəricilər haqqında geniş təqdimatla çıxış etmişdir.
Bildirilmişdir ki, Birlik yarandığı gündən etibarən yüzlərlə eşitmə məhdudiyyətli uşağın koxlear implant əməliyyatına yönləndirilməsinə, dövlət dəstəyindən yararlanmasına, əməliyyatdan sonrakı reabilitasiyasına və cəmiyyətə inteqrasiyasına dəstək göstərmişdir. Təqdim olunan statistik məlumatlar layihə iştirakçıları tərəfindən böyük maraqla qarşılanmışdır.
Qeyd olunmuşdur ki, erkən diaqnostika, vaxtında aparılan koxlear implant əməliyyatı və düzgün reabilitasiya nəticəsində minlərlə uşaq bu gün eşidir, danışır, ümumtəhsil məktəblərində yaşıdları ilə birlikdə təhsil alır və cəmiyyətin fəal üzvləri kimi həyatlarını davam etdirirlər.
"Koxlear İmplantlı Şəxslərə Sosial Yardım" İctimai Birliyi 2022-ci ildən fəaliyyət göstərir. Birliyin əsas məqsədi eşitmə məhdudiyyətli uşaqların erkən aşkarlanmasına, vaxtında koxlear implant əməliyyatına yönləndirilməsinə, ailələrin düzgün məlumatlandırılmasına, dövlət dəstəyi mexanizmlərinin təbliğinə və əməliyyatdan sonrakı reabilitasiya prosesinin gücləndirilməsinə töhfə verməkdir. Layihə çərçivəsində keçirilən maarifləndirici tədbirlər valideynlərin çoxsaylı suallarının cavablandırılmasına, mütəxəssislərlə birbaşa ünsiyyət qurulmasına, təcrübə mübadiləsinin aparılmasına və iştirakçıların aktual mövzular üzrə dolğun məlumat əldə etməsinə mühüm töhfə vermişdir.
Layihənin yekunu olaraq ailələrin məlumatlılıq səviyyəsinin yüksəldilməsi, uşaqların reabilitasiya və sosial adaptasiya prosesinin daha səmərəli təşkilinə dəstək göstərilməsi, dövlət-vətəndaş cəmiyyəti əməkdaşlığının gücləndirilməsi istiqamətində mühüm nəticələr əldə olunmuşdur.
Tədbirin həyata keçirilməsidə məkanla bağlı göstərdiyi diqqət və dəstəyə görə *BUREAU 19* rəhbərliyinə dərin minnətdarlığımızı bildiririk.
Tədbirin sonunda layihənin həyata keçirilməsində dəstək göstərən bütün tərəfdaşlara təşəkkür edilmiş, iştirakçılara sertifikatlar təqdim olunmuşdur.
"Koxlear İmplantlı Şəxslərə Sosial Yardım" İctimai Birliyi bundan sonra da eşitmə məhdudiyyətli uşaqların sağlam gələcəyi, keyfiyyətli reabilitasiyası, cəmiyyətə tam inteqrasiyası və onların hüquqlarının müdafiəsi istiqamətində fəaliyyətini davam etdirəcəkdir.
"İkinci səs olaq, sükuta həyat verək!"
"Koxlear implant möcüzə deyil, elmin və dövlət dəstəyinin sayəsində minlərlə uşağa yenidən eşitmək, danışmaq və həyata bərabər imkanlarla qoşulmaq imkanı yaradan ən böyük ümiddir."
Ən son xəbərləri səhifəmizdən də izləyin
