Dankan Norman: Azərbaycan Böyük Britaniya üçün mühüm regional tərəfdaşdır

Böyük Britaniya Azərbaycanı mühüm regional tərəfdaş kimi qiymətləndirir.

"innews media" xəbər verir ki, bunu Böyük Britaniyanın Azərbaycandakı səfiri Dankan Norman Bakıda keçirdiyi mətbuat konfransında bildirib.

Səfir qeyd edib ki, o, etimadnaməsini Prezident İlham Əliyevə təqdim etdikdən üç gün sonra jurnalistlərlə görüşüb. D.Norman bu dövrün iki ölkə arasında münasibətlərin inkişafı baxımından əlamətdar olduğunu vurğulayıb.

O, Böyük Britaniyanın Azərbaycanla tərəfdaşlığın daha da inkişaf etdirilməsində qərarlı olduğunu bildirib:

“Bu münasibətlər baxımından əlamətdar bir dönəmdə Azərbaycana gəlmişəm. Birləşmiş Krallıq Azərbaycanı mühüm regional tərəfdaş kimi qiymətləndirir və mən bu tərəfdaşlığın inkişafını təmin etməkdə qərarlıyam. Birləşmiş Krallıq və Azərbaycan arasında otuz ildən çox əməkdaşlıq tarixi var. Bu münasibətlər enerji sahəsində başlayıb. BP-nin qabaqcıl investisiyası Azərbaycanın müasir iqtisadi tarixinin formalaşmasına töhfə verib və biz hələ də həmin sağlam təməlin üzərində inşa etməyə davam edirik.”