https://innews.az/uploads/news/2026-08/_innews_06adca5154149f5782da169c0_o.jpg
Ukraynanın Azərbaycandakı səfiri Yuri Husev ölkəsinin Müstəqillik Günü münasibətilə məqalə yazıb.
"innews media" həmin yazını təqdim edir:
Ukraynanın müstəqilliyinin 35 ili: birlikdə müdafiə etdiyimiz azadlıq və müstəqillik
24 avqustda Ukrayna müstəqilliyinin bərpasının 35-ci ildönümünü qeyd edir. Bu gün ukraynalılar üçün xüsusi əhəmiyyət daşıyır. Müstəqillik artıq yalnız fəxr etdiyimiz tarixi nailiyyət deyil. Bu, Ukrayna xalqının böyük səylər və qurbanlar bahasına hər gün müdafiə etdiyi məsuliyyətdir.
35 il ərzində Ukrayna öz dövlətinin qurulması, demokratik institutların möhkəmləndirilməsi, iqtisadiyyatın inkişafı, milli kimliyinin təsdiqi, Avropanın siyasi və sivilizasiya məkanına qayıdışı istiqamətində mürəkkəb yol keçib. Lakin son illər dövlətçiliyimiz üçün ən ağır sınağa çevrilib. 2014-cü ildən, xüsusilə də 2022-ci ilin fevralında Rusiyanın genişmiqyaslı işğalının başlanmasından sonra Ukrayna təkcə öz torpağını müdafiə etmir. Biz hər bir xalqın öz gələcəyini müstəqil şəkildə seçmək, öz yolunu müəyyənləşdirmək və kənardan diktə olmadan yaşamaq hüququnu müdafiə edirik.
Məhz buna görə Ukrayna Prezidenti Volodimir Zelenski vurğulayır ki, Ukrayna üçün sülh müvəqqəti fasilə ola bilməz — o, ədalətli və davamlı olmalı, etibarlı təhlükəsizlik zəmanətləri ilə təmin edilməlidir. Ukrayna ardıcıl olaraq diplomatiya və danışıqların tərəfdarıdır, lakin əmindir ki, dövlətlərin suverenliyinə və ərazi bütövlüyünə, BMT Nizamnaməsinin prinsiplərinə hörmət edilmədən və Ukraynanın özünü müdafiə etmək qabiliyyəti təmin olunmadan davamlı sülh mümkün deyil.
Ukraynanın ikinci strateji prioriteti onun Avropa gələcəyidir. Bu gün ölkəmiz artıq sadəcə vahid Avropanın bir hissəsi olmağa can atmır — o, Avropanın təhlükəsizlik sisteminin formalaşdırılmasında fəal iştirak edir. Ukrayna Prezidenti vurğulayır ki, güclü, müstəqil və Avropaya inteqrasiya olunmuş Ukrayna bütün qitənin təhlükəsizliyinin mühüm tərkib hissəsidir. Avropa İttifaqına üzvlük yolu əsas milli layihələrdən biri olaraq qalır, Ukrayna diplomatiyası isə danışıqlar prosesinin mümkün qədər sürətlə irəliləməsi üçün çalışır.
Bu siyasətin əsas prioritetlərindən biri region ölkələri ilə sıx tərəfdaşlıq münasibətlərinin inkişaf etdirilməsidir. Bu kontekstdə Ukrayna ilə Azərbaycan arasında münasibətlər xalqlarımızın uzun illərə söykənən qardaşlıq dostluğu və qarşılıqlı dəstəyinə əsaslanan xüsusi strateji əhəmiyyət daşıyır.
Ölkələrimizi suverenliyə və ərazi bütövlüyünə dərin qarşılıqlı hörmət birləşdirir. Son illərdə bu, ən yüksək səviyyədə dəfələrlə təsdiqlənib. 2025-ci ilin yanvarında Ukrayna Prezidenti Volodimir Zelenski Davosda Azərbaycan Prezidenti İlham Əliyevlə görüşüb. Həmin ilin oktyabrında liderlər Kopenhagendə dialoqu davam etdiriblər. Bu görüşlər siyasi, iqtisadi, humanitar və enerji sahələrində əməkdaşlığın inkişafına, eləcə də regional təhlükəsizlik məsələlərinə həsr olunub.
Volodimir Zelenskinin 25 aprel 2026-cı ildə Azərbaycana işgüzar səfəri xüsusilə mühüm hadisə oldu. Bu, genişmiqyaslı müharibənin başlanmasından etibarən dörd ildən artıq müddət ərzində Ukrayna Prezidentinin Azərbaycana ilk səfəri idi. Qəbələdə keçirilən danışıqlar yüksək səviyyəli siyasi etimadı və strateji tərəfdaşlığın genişləndirilməsi üzrə konkret gündəliyi nümayiş etdirdi. Danışıqların yekunlarına əsasən müxtəlif sahələri əhatə edən altı ikitərəfli sənəd imzalandı.
Münasibətlərimizin praktiki məzmunla zənginləşməsi də az əhəmiyyət daşımır. Əsas istiqamətlərdən biri energetikadır. Rusiyanın Ukraynanın enerji infrastrukturuna terror hücumları şəraitində Azərbaycanın yardımı həmrəyliyin və qardaşlıq dəstəyinin mühüm təzahürünə çevrilib. Qəbələdə keçirilən danışıqlar zamanı Ukrayna Prezidenti 11 enerji yardımı paketinə görə Azərbaycana ayrıca təşəkkür edib. Ölkələr, həmçinin enerji sahəsində əməkdaşlığı davam etdirmək və ticarət dövriyyəsini artırmaq barədə razılığa gəliblər.
Tərəfdaşlığımızın digər mühüm elementi humanitar əməkdaşlıqdır. Azərbaycan Rusiya təcavüzündən zərər çəkmiş ukraynalı uşaqları qəbul edir: Rusiyanın genişmiqyaslı təcavüzünün başlanmasından etibarən 2024-cü ilin fevralından Azərbaycanda həlak olmuş və itkin düşmüş Qəhrəmanların, eləcə də xilasedicilərimizin 660-dan çox övladı, həmçinin Ukraynanın hər gün atəşə məruz qalan cəbhəyanı bölgələrindən olan uşaqlar qayğı, reabilitasiya və istirahətlə təmin olunublar. Bu, sadəcə humanitar proqram deyil — ukraynalıların hiss etdiyi və yüksək qiymətləndirdiyi əsl insani həmrəyliyin təzahürüdür. Azərbaycan Respublikası işğaldan azad edilmiş Qəhrəman Şəhər İrpenin bərpasına böyük töhfə verib və bu dəstəyi genişləndirməkdə davam edir.
Enerji və nəqliyyat sahələrində əməkdaşlığın rolunu ayrıca vurğulamaq istərdim. Hətta müharibə şəraitində belə Ukrayna yalnız mövcud əlaqələri qorumağa deyil, qarşılıqlı inkişaf üçün yeni imkanlar yaratmağa çalışır. Ticarətin daha da artırılması, enerji sahəsində qarşılıqlı fəaliyyətin genişləndirilməsi, nəqliyyat marşrutlarının inkişafı və yeni investisiya layihələrinin həyata keçirilməsi ilə bağlı planlar münasibətlərimizin uzunmüddətli gündəliyinin bir hissəsinə çevrilir. Ukrayna və Azərbaycanın strateji tərəfdaşlığın iqtisadi ölçüsünü daha da genişləndirmək üçün bütün imkanları var.
Bu gün Ukrayna müstəqilliyinin 35 illiyini qeyd edərkən biz “azadlıq və müstəqillik” sözlərinin dəyərini xüsusilə dərindən dərk edirik. Məhz buna görə Ukraynanın suverenliyini və ərazi bütövlüyünü ardıcıl şəkildə dəstəkləyən, humanitar və enerji yardımı göstərməyə davam edən Azərbaycanın mövqeyinə hörmət və minnətdarlıqla yanaşırıq. Ukraynanın ali rəhbərliyi və xalqı bu dəstəyə görə Azərbaycana dəfələrlə minnətdarlığını ifadə edərək prinsipial mövqelərimizin qarşılıqlı xarakter daşıdığını vurğulayıb. Bu, bizim üçün xüsusi dəyərə malikdir. Müstəqillik, suverenlik və ərazi bütövlüyü anlayışlarının arxasında milli ləyaqət, insanların təhlükəsizliyi, tarixi yaddaş hüququ və öz gələcəyini müstəqil müəyyən etmək imkanı dayanır. Ukrayna-Azərbaycan münasibətləri həmişə məhz belə qarşılıqlı anlaşma və dəstəyə əsaslanıb. Bizi iqtisadi inkişafa, eləcə də Qara dəniz-Xəzər regionunda ədalətli sülhə və təhlükəsizliyə can atmaq birləşdirir. Ən əsası isə bizi sərhədlərin toxunulmazlığının və ərazi bütövlüyünün heç bir halda sövdələşmə predmeti ola bilməyəcəyinə dair qəti inam birləşdirir.
Ukrayna müstəqilliyinin 36-cı ilinə gələcəyə inamla baxan güclü, cəsur və sarsılmaz dövlət kimi qədəm qoyur. Bütün Ukrayna xalqı ədalətli və davamlı sülh, dövlətimizin ərazi bütövlüyünün bərpası, Ukraynanın layiqli gələcəyi, vətəndaşlarımızın, ölkəmizin və bütün Avropanın təhlükəsizliyi uğrunda mübarizəni davam etdirir. Bu yolda hər zaman Ukraynanın yanında olmuş və olmaqda davam edən Azərbaycanın, tərəfdaşlarımızın və dostlarımızın dəstəyini xüsusilə yüksək qiymətləndiririk.
Hər bir ukraynalı üçün əlamətdar olan bu bayram günündə Ukrayna ilə həmrəyliyə, humanitar və enerji yardımına, ukraynalı uşaqlara göstərilən qayğıya, eləcə də ölkəmizin suverenliyinə və ərazi bütövlüyünə ardıcıl dəstəyə görə Azərbaycana səmimi minnətdarlığımı bildirmək istərdim.
Əminəm ki, Ukrayna-Azərbaycan strateji tərəfdaşlığı bundan sonra da möhkəmlənəcək, ədalətli sülh, regionda və dünyada təhlükəsizlik, eləcə də xalqlarımızın davamlı inkişafı və rifahı naminə əməkdaşlıq üçün yeni imkanlar açacaq.
Ukraynanın müstəqilliyinin 35-ci ildönümü mübarək!
Yaşasın Ukrayna! Yaşasın Azərbaycan!
Ən son xəbərləri səhifəmizdən də izləyin
