Çövkən üzrə dünya çempionu olan Azərbaycan idmançılarına fəxri ad verildi

İyun ayında Bakıda təşkil olunmuş Çövkən üzrə Dünya Çempionatında qələbə qazanmış Azərbaycan idmançıları “Azərbaycan Respublikasının İdman ustası” dərəcəsinə layiq görülüb. Gənclər və idman naziri Fərid Qayıbovun beynəlxalq yarışlarda uğur qazanmış idmançılarla görüşündə Elçin Camallıya, Tərlan Qurbanəliyevə, Vahid Məmmədova, Şəfayət Budaqova, Şahmar Nağızadəyə, Amil Namazova, Rəşad Həsənova və Səxavət İsmayılova fəxri adın döş nişanları və müvafiq vəsiqələri təqdim edilib.

Əlavə edək ki, çövkən üzrə Azərbaycan yığma komandası 7-13 iyun aralığında keçirilmiş dünya çempionatında keçirdiyi 4 oyundan 3-də qalib gəlib birini heç-heçə başa vuraraq fəxri kürsünün ən yüksək pilləsinə qalxıb.