https://innews.az/uploads/news/2026-09/_innews_43c645814bb8f2892625de7ca_o.jpg
“Mançester Siti”nin baş məşqçisi Enzo Mareskanın səsləndirdiyi fikirlər “Çelsi” azarkeşlərinin narazılığına səbəb olub.
İtaliyalı mütəxəssis məşqçilik karyerasının ən yaddaqalan uğurlarından danışarkən “Çelsi”nin adını çəkməyib.
Mareskadan karyerasının ən qürurverici anının hansı olduğu soruşulub. Onun məşqçilik fəaliyyətində “Lester”lə Çempionşipin, “Çelsi” ilə isə Konfrans Liqası və Klublararası dünya çempionatının qalibi olmaq kimi uğurları var.
Mareska “Çelsi”nin adını çəkmək əvəzinə London təmsilçisini “başqa klub” kimi təqdim edib:
“Düşünürəm ki, qısa müddət ərzində kifayət qədər şanslı olmuşam. “Mançester Siti”də olduğum mövsüm üçlük qazandıq. Sonra ayrıldım və “Lester”lə liqanı (Çempionşip) qazandıq. Daha sonra başqa kluba keçdim və orada da bəzi titullar əldə etdik. Son dörd-beş ildə kifayət qədər şanslı olmuşam, çünki getdiyim hər yerdə titullar qazanmışıq. Ümid edirəm ki, burada da eyni şey baş verəcək”
Mareskanın bu ifadəsi sosial şəbəkədə “Çelsi” azarkeşlərinin sərt reaksiyasına səbəb olub. Xüsusilə onun klubun adını çəkmək əvəzinə “başqa klub” ifadəsindən istifadə etməsi narazılıq doğurub.
Mareska 2025/26 mövsümünün gedişində “Çelsi”dən ayrılıb və bu ilin iyununda “Mançester Siti”nin baş məşqçisi təyin olunub. Onun London klubundan ayrılması da qalmaqalsız ötüşməyib: “Çelsi” italiyalının gedişinin mövsümə mənfi təsir etdiyini bildirib, Mareska isə qərarın yalnız özünə aid olduğunu açıqlayaraq klubdan ayrıldığı üçün üzr istəyib.
Ən son xəbərləri səhifəmizdən də izləyin
