Kikboksinq üzrə idmançı Baba Abbaszadə iki il müddətinə diskvalifikasiya edilib

Kikboksinq üzrə Azərbaycan idmançısı Baba Abbaszadə antidopinq qaydalarını pozduğuna görə iki il müddətinə diskvalifikasiya edilib.

İdmançı barəsində sanksiya 6 iyul 2026-cı il tarixindən qüvvəyə minib və 6 iyul 2028-ci il tarixində başa çatacaq.

Məlumata görə, Abbaszadənin nümunəsində qadağan edilmiş maddə və ya onun metabolitləri, yaxud markerlərinin mövcudluğu müəyyən edilib. Bu hal antidopinq qaydalarının 2.1-ci maddəsinin, həmçinin qadağan edilmiş maddə və ya qadağan edilmiş üsuldan istifadə və ya istifadə cəhdinin müəyyən edilməsi isə 2.2-ci maddəsinin pozuntusu kimi qiymətləndirilib.

Pozuntu ilə əlaqəli qadağan edilmiş maddə S5 – Diuretiklər və ya Gizlədici Agentlər kateqoriyasına daxil olan Furosemid olub.

Beləliklə, Baba Abbaszadə 6 iyul 2026-cı ildən 6 iyul 2028-ci ilədək antidopinq qaydalarına əsasən yarışlardan kənarlaşdırılıb.