https://innews.az/uploads/news/2026-09/_innews_ac3312e1dda6c1ceaec2de670_o.jpg
AHK Azərbaycanın İcraçı direktoru Nargis Wieck Bakı İqlim Fəaliyyəti Həftəsi 2026 çərçivəsində keçirilən “İnnovasiyalar, rəqəmsal texnologiyalar və regional əməkdaşlıq vasitəsilə Yaşıl Enerji Sənayesinin İnkişafı” mövzusunda panel müzakirələrinə qoşulub.
O, Azərbaycanı Mərkəzi Asiya, Xəzər regionu və Avropa arasında strateji körpü kimi təqdim edərək, Orta Dəhlizin təkcə nəqliyyat marşrutu kimi deyil, həm də enerji və rəqəmsal infrastrukturu birləşdirən inteqrasiya olunmuş marşruta çevrilə biləcəyini vurğulayıb.
“Siyasi ambisiyalar maliyyələşdirilə bilən layihələrə çevrilməlidir. Lokallaşma və güclü tərəfdaşlıqlar vasitəsilə Almaniya şirkətləri regional iqtisadi və enerji ekosisteminin bir hissəsinə çevrilə bilərlər.”
Nargis Wieck, AHK Azərbaycanın İcraçı direktoru
Wieck qeyd edib ki, etibarlı yerli tərəfdaşlar, beynəlxalq standartlara uyğunlaşdırılmış tələblər və şəffaf sertifikatlaşdırma prosedurları Azərbaycan və daha geniş Xəzər regionu bazarına daxil olan xarici şirkətlər üçün həyati əhəmiyyət kəsb edir. O, həmçinin investisiyaların praktiki olaraq necə strukturlaşdırıla və reallaşdırıla biləcəyini göstərən uğurlu nümunəvi layihələrin nümayiş etdirilməsinin vacibliyini diqqətə çatdırıb.
Bu kontekstdə o, Xəzər-Qara Dəniz-Avropa Yaşıl Enerji Dəhlizini və "Green Energy Corridor Power Company" (GECO) müəssisəsini Almaniya və Avropa tərəflərinin texnologiya təminatçısı, investor, layihə tərəfdaşı və potensial alıcı kimi iştirakı üçün əsas çərçivə mexanizmləri kimi vurğulayıb. Konkret nümunə kimi Bakıda keçirilən Almaniya-Azərbaycan İxrac və Maliyyə Konfransı zamanı GECO ilə "Siemens Energy Global GmbH & Co. KG" arasında imzalanmış Məfhumluq Müqaviləsini (NDA) göstərmək olar. Sənəd yüksək gərginlikli sabit cərəyan (HVDC) texnologiyasından istifadə etməklə yaşıl enerjinin ötürülməsi sahəsində əməkdaşlığı nəzərdə tutur.
AHK Azərbaycan, Bərpa Olunan Enerji Mənbələri Dövlət Agentliyi (AREA) ilə çoxillik əməkdaşlığına əsaslanaraq, bazara çıxışın asanlaşdırılması və aidiyyəti tərəflər arasında əlaqələrin qurulması istiqamətində fəaliyyətini davam etdirəcək. Bu prioritetlər 6 oktyabr tarixində Bakıda təşkil olunacaq German-Azerbaijani Connectivity Conference 2026 çərçivəsində də irəli sürüləcək.
Ən son xəbərləri səhifəmizdən də izləyin
