https://innews.az/uploads/news/2026-09/_innews_f0a9dd47ed4bd7ad0d68b2fe6_o.jpg
Azərbaycan Dövlət Pedaqoji Universitetinin (ADPU) Beynəlxalq əlaqələr üzrə prorektorluğunun nəzdində Türkoloji mərkəzin direktoru Şəkər Məmmədova Türkiyənin Xaricdəki Türklər və Qohum İcmalar Baş İdarəsi (YTB) tərəfindən təşkil olunan Türk Dünyası Ali Təhsildə Ortaqlıq Proqramında (ORTAK) iştirak edir.
7–11 sentyabr 2026-cı il tarixlərində Ankarada keçirilən proqram çərçivəsində Azərbaycan, Qazaxıstan, Qırğızıstan, Özbəkistan və Türkmənistanı təmsil edən 25 rəhbər, akademik heyət üzvü və mütəxəssis bir araya gəlib. “Dildə, fikirdə, işdə birlik” prinsipi əsasında qurulan proqram Türk dünyasının ali təhsil qurumları arasında əməkdaşlığı yeni, daha institusional bir mərhələyə daşımağı hədəfləyir.
ORTAK proqramının açılış mərasimində Xaricdəki Türklər və Qohum İcmalar Baş İdarəsinin rəhbəri Abdulhadi Turus, Ədalət və İnkişaf Partiyasının Bursa millət vəkili və Türkiyə-Özbəkistan Dostluq Qrupunun sədri Osman Mesten, Türkiyə Elmlər Akademiyasının (TÜBA) prezidenti professor Müzəffər Şəkər və ORTAK proqramının akademik koordinatoru, Hacettepe Universitetinin Təhsil fakültəsinin dekanı professor Şəfiqə Şülə Ərçətin çıxış ediblər.
İştirakçılar proqram müddətində dünyada və Türkiyədə ali təhsil siyasəti və strategiyalarından tutmuş, keyfiyyət təminatı və akkreditasiya mexanizmlərinə qədər geniş bir sahədə nəzəri və praktiki bilik əldə edəcəklər. Xüsusi diqqət ali təhsildə rəqəmsal transformasiya və təhsil texnologiyalarına, o cümlədən süni intellektin universitetlərə inteqrasiyasına yönəldilib. Bundan əlavə, beynəlmiləlləşmə və birgə təhsil proqramları, eləcə də təhsildə gələcək tendensiyalar və siyasətlərin hazırlanması mövzuları da proqramın əsas komponentlərindəndir.
Proqram çərçivəsində Türkiyənin ali təhsil sisteminin institusional quruluşu, Avropa Kredit Transfer Sistemi (AKTS) və akkreditasiya təcrübəsi də ətraflı təqdim olunacaq. İştirakçılar həmçinin YÖK, Milli Təhsil Nazirliyi, TİKA və TRT kimi qurumlara səfər edərək onların fəaliyyəti ilə yerində tanış olacaq.
Proqramın strateji hədəflərindən biri iştirakçı ölkələrin ali təhsil qurumları arasında rəqəmsal əməkdaşlıq şəbəkəsinin yaradılmasıdır. Bu şəbəkə vasitəsilə uğurlu təcrübələr, akademik təşəbbüslər və birgə əməkdaşlıq imkanlarının mübadiləsi, eləcə də proqram çərçivəsində qurulan əlaqələrin uzunmüddətli tərəfdaşlıqlara çevrilməsi nəzərdə tutulur.
Bu baxımdan proqramda iştirak ADPU-ya türk dünyasının ali təhsil müəssisələri ilə əlaqələrini genişləndirmək, yeni institusional tərəfdaşlıqlar qurmaq və beynəlxalq akademik mobillik imkanlarını artırmaq üçün əlverişli zəmin yaradır.
Ən son xəbərləri səhifəmizdən də izləyin
