https://innews.az/uploads/news/2026-09/_innews_85a208e649548df27502b19b4_o.jpg
15 Sentyabr – Bilik Günü ərəfəsində Naxçıvan Muxtar Respublikasının Təhsil Nazirliyi, Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi və Naxçıvan Muxtar Respublikası Həmkarlar İttifaqları Şurasının birgə təşkilatçılığı ilə xüsusi qayğıya ehtiyacı olan uşaqlarla, o cümlədən valideynlərini itirmiş və valideyn himayəsindən məhrum olmuş, təkvalideynli, sağlamlıq imkanları məhdud, qazi övladı, aztəminatlı və çoxuşaqlı ailələrdən olan uşaqlara görüş keçirilib. Əvvəlcə Dövlət Himni səsləndirilib, ardınca Ulu Öndər Heydər Əliyevin və Azərbaycanın ərazi bütövlüyü uğrunda şəhid olmuş qəhrəmanların əziz xatirəsi bir dəqiqəlik sükutla yad edilib. Naxçıvan Dövlət Universitetinin nəzdində Naxçıvan Dövlət Texniki Kollecində keçirilən görüşdə Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsinin sədri Ramilə Seyidova çıxış edərək uşaqları 15 Sentyabr – Bilik Günü münasibətilə təbrik edib. Komitə sədri bildirib ki, əsası Ulu Öndər Heydər Əliyev tərəfindən qoyulan və Azərbaycan Respublikasının Prezidenti cənab İlham Əliyev tərəfindən uğurla həyata keçirilən dövlət uşaq siyasətinin nəticəsidir ki, ölkəmizdə və onun ayrılmaz tərkib hissəsi olan Naxçıvan Muxtar Respublikasında uşaqlara xüsusi qayğı və diqqət göstərilir. Uşaqların hüquq və sağlamlıqlarının qorunması, milli dəyərlərə bağlılıq ruhunda tərbiyə olunması, intellektual və mənəvi inkişafının təmin edilməsi, asudə vaxtlarının səmərəli təşkili, həmçinin cəmiyyətin ictimai-mədəni həyatında iştiraklarının təmin olunması məqsədilə davamlı və məqsədyönlü tədbirlər həyata keçirilir, mütəmadi olaraq qanunvericilik bazası təkmilləşir. Görülən işlərin nəticəsidir ki, muxtar respublikada uşaq cinayətləri, uşaqların təhsildən yayınması, ana və uşaq ölümü minimum səviyyədədir. Komitə sədri vurğulayıb ki, dövlət uşaq siyasətinin uğurla həyata keçirilməsində Azərbaycan Respublikasının Birinci vitse-prezidenti Mehriban Əliyevanın uşaqlarla bağlı fəaliyyəti də xüsusi əhəmiyyət daşıyır. Mehriban Əliyevanın həyata keçirdiyi humanitar layihələr uşaqların sosial müdafiəsinin gücləndirilməsinə, onların hüquqlarının qorunmasına, təhsil və inkişaf imkanlarının genişləndirilməsinə, eləcə də cəmiyyətə inteqrasiyasına mühüm töhfələr verir. Ramilə Seyidova çıxışının sonunda uşaqların sağlam, savadlı, vətənpərvər və milli-mənəvi dəyərlərə bağlı şəxsiyyət kimi formalaşması istiqamətində həyata keçirilən məqsədyönlü dövlət siyasətinə görə Azərbaycan Respublikasının Prezidenti cənab İlham Əliyevə və Azərbaycan Respublikasının Birinci vitse-prezidenti Mehriban xanım Əliyevaya təşəkkürünü bildirib, yeni tədris ilində bütün şagird və tələbələrə uğurlar arzulayıb. Daha sonra Azərbaycan Həmkarlar İttifaqları Konfederasiyasının sədr müavini, Naxçıvan Muxtar Respublikası Həmkarlar İttifaqları Şurasının sədri Qəzənfər Abdullayev çıxış edərək bildirib ki, Naxçıvan Muxtar Respublikası Həmkarlar İttifaqları Şurası da öz fəaliyyəti çərçivəsində uşaqlara göstərilən diqqət və qayğını daim prioritet istiqamətlərdən biri kimi müəyyənləşdirir. Şura tərəfindən uşaqların, o cümlədən şəhid və qazi övladlarının, aztəminatlı ailələrdən olan və xüsusi qayğıya ehtiyacı olan uşaqların sosial rifahının yaxşılaşdırılması məqsədilə müxtəlif sosialyönümlü tədbirlər və layihələr həyata keçirilir. Bu çərçivədə uşaqlara məktəbli geyimlərinin və dərs ləvazimatlarının təqdim edilməsi ilə yanaşı, onların asudə vaxtlarının səmərəli təşkili, dünyagörüşünün genişləndirilməsi, sosial fəallığının artırılması və hərtərəfli inkişafının dəstəklənməsi istiqamətində də müvafiq tədbirlər görülür. Qəzənfər Abdullayev qeyd edib ki, təkcə ötən dövr ərzində 2119 nəfər şəhid və qazi övladına, sosial qayğıya ehtiyacı olan uşaqlara, həmçinin internat məktəbində təhsil alan 214 nəfər şagirdə məktəbli geyimləri, dərs ləvazimatları və müxtəlif hədiyyələr təqdim edilib. Ümumilikdə isə 613 nəfər xüsusi qayğıya ehtiyacı olan uşaq üçün Ağbulaq İstirahət Mərkəzində istirahət və yay düşərgələri təşkil olunub. Bu gün də həmin ənənəni davam etdirərək Naxçıvan Muxtar Respublikası Həmkarlar İttifaqları Şurası tərəfindən ümumilikdə 50 nəfər uşağa məktəbli geyimləri təqdim olunub. Naxçıvan Muxtar Respublikasının təhsil nazirinin müavini Əli Vəliyev çıxış edərək bildirib ki, uşaqların keyfiyyətli təhsilə çıxışının təmin olunması dövlətin sosial siyasətinin əsas istiqamətlərindən biridir. Xüsusi qayğıya və sosial müdafiəyə ehtiyacı olan ailələrdən olan uşaqların təhsil prosesinə bərabərhüquqlu şəkildə cəlb edilməsi, onların təhsildən yayınmasının qarşısının alınması və məktəbə hazırlıq imkanlarının yaxşılaşdırılması diqqət mərkəzində saxlanılır. Əli Vəliyev qeyd edib ki, təhsilin əlçatanlığının və keyfiyyətinin artırılması məqsədilə yeni məktəb binaları tikilir, müasir təhsil infrastrukturu yaradılır, eləcə də distant təhsil imkanlarından istifadə genişləndirilir. Təhsil nazirinin müavini yeni tədris ilinin başlanması münasibətilə şagird və tələbələri təbrik edərək onlara təhsildə uğurlar arzulayıb. Çıxış edən himayədar Xatirə Həsənzadə göstərilən diqqət və dəstəyə görə təşkilatçılara təşəkkürünü bildirib. Görüşün sonunda uşaqlara hədiyyələr – məktəbli geyimi, məktəbli çantası və ayaqqabı təqdim olunub. Bu təşəbbüs uşaqlar və valideynlər tərəfindən sevinclə qarşılanıb. Qeyd edək ki, muxtar respublikanın digər rayonlarında da silsilə görüşlər keçirilib və ümumilikdə təşkilatçılar tərəfindən xüsusi kateqoriyadan olan 115 uşağa məktəbli geyimi, məktəbli çantası və ayaqqabı təqdim olunub.
Ən son xəbərləri səhifəmizdən də izləyin
